سرینگر:بھارت کے غیر قانونی زیر تسلط جموں کشمیر میں امرناتھ غار کے قریب بادل پھٹنے سے کم از کم 15 یاتری ہلاک جبکہ چالیس سے زائد لاپتہ ہو گئے ہیں۔
کشمیر میڈیا سروس کے مطابق حکام نے بتایا کہ جنوبی کشمیر کے ضلع اسلام آباد میں واقع امرناتھ غار کے قریب جمعہ کی شام بادل پھٹنے سے کم از کم دس یاتری ہلاک جبکہ تین درجن سے زائد لاپتہ ہوگئے۔واقعے میں 25 خیموں اور تین باورچی خانوں کو بھی نقصان پہنچا۔
انہوں نے کہا کہ بہتا ہوا پانی غارکے باہر بیس کیمپ سے ٹکرا گیا۔ انہوں نے کہا کہ فوج اور پولیس نے بچاو آپریشن شروع کر دیا ہے۔
حکام کے مطابق علاقے میں پانی بھر جانے کی وجہ سے امرناتھ یاترا کو عارضی طور پر روک دیا گیا ہے۔ گزشتہ ماہ کی 30تاریخ کی شروع ہونے والی ہندوؤں کی سالانہ امرناتھ یاترا43روز تک جاری رہے گی۔
