اسلام آباد: وفاقی وزیر آئی ٹی نے پاکستان میں پیڈ گوگل ایپلی کیشن سروسز معطل ہونے کا خدشہ ظاہر کر دیا۔
تفصیلات کے مطابق وفاقی وزیر آئی ٹی سید امین الحق نے وزیر خزانہ اسحاق ڈار کو خط لکھ کر اس خدشے کا اظہار کیا ہے کہ اسٹیٹ بینک کے اقدام سے پاکستان میں پیڈ گوگل ایپلیکیشن سروسز معطل ہو جائیں گی۔
امین الحق کے مطابق کچھ روز قبل ٹیلی کام آپریٹرز کی جانب سے وزارت آئی ٹی کو خط لکھا گیا تھا، جس میں اسٹیٹ بینک کی جانب سے گوگل کو ادائیگی روکنے کے حوالے سے خدشات کا اظہار کیا گیا تھا، معاملے کی سنگینی پر تمام اسٹیک ہولڈرز سے مشاورت کے بعد وزارت خزانہ کو مراسلہ لکھنے کا فیصلہ کیا گیا۔
وفاقی وزیر نے خط میں لکھا کہ ٹیلی کام انڈسٹری پہلے ہی مشکلات کا شکار ہے، اس طرح کے فیصلے معاملات مزید خراب کر سکتے ہیں، اسٹیٹ بینک کی جانب سے ادائیگی روکنے سے پاکستان میں پیڈ گوگل ایپلی کیشن سروسز معطل ہوجائیں گی، اور فری گوگل ایپلیکیشنز کی سروسز برقرار رہیں گی۔
امین الحق کا کہنا تھا کہ بین الاقوامی اداروں کو ادائیگی روکنے کا عمل پاکستان کی ساکھ بھی متاثر کر سکتا ہے، اور پیڈ ایپلیکیشنز استعمال کرنے والے افراد کو شدید مشکلات کا سامنا کرنا پڑ سکتا ہے۔
انھوں نے خط میں مطالبہ کیا کہ وزیر خزانہ اس معاملے کا فوری نوٹس لیتے ہوئے اسٹیٹ بینک کو ادائیگی جاری رکھنے کی ہدایت کریں، اور لکھا کہ ضروری ہے کہ مستقبل میں آئی ٹی و ٹیلی کام کے حوالے سے فیصلوں میں وزارت کی مشاورت لازمی شامل کی جائے۔
واضح رہے کہ اسٹیٹ بینک آف پاکستان کی جانب سے غیر ملکی خدمات فراہم کرنے والوں کو 34 ملین ڈالر کی ادائیگی منسوخ کرنے کے بعد، پاکستان میں موبائل صارفین یکم دسمبر 2022 سے گوگل پلے اسٹور کی سروسز ڈاؤن لوڈ نہیں کر سکیں گے۔
