سعودی عرب میں بھی کرونا وائرس کیسز میں اضافہ، 2 اموات

ریاض: سعودی عرب میں کرونا وائرس کیسز میں اضافہ دیکھنے میں آرہا ہے جبکہ 2 اموات بھی رپورٹ ہوئی ہیں۔

اردو نیوز کے مطابق سعودی عرب میں کرونا وائرس کے نئے کیسز میں اضافہ دیکھنے میں آیا ہے۔

وزارت صحت کا کہنا ہے کہ سوموار کو کرونا وائرس کے 280 نئے کیسز سامنے آئے ہیں جبکہ 2 اموات ہوئی ہیں۔

کرونا وبا کے آغاز سے اب تک کرونا کے متاثرین کی کل تعداد 8 لاکھ 32 ہزار 709 ہوگئی ہے، مزید 2 اموات کی تصدیق کے بعد مرنے والوں کی تعداد 9 ہزار 629 ہوگئی۔

وزارت صحت کا کہنا ہے کہ ریاض میں 102، جدہ میں 32، دمام میں 15 اور طائف میں 11 نئے مریض سامنے آئے ہیں جبکہ دیگر شہروں سے مجموعی طور پر 10 کیسز رپورٹ ہوئے ہیں۔

وزارت صحت کے مطابق سوموار کو کرونا کے 123 مریض صحت یاب ہوئے، اب تک شفایاب ہونے والوں کی تعداد 8 لاکھ 18 ہزار 675 ہوگئی ہے، نئے مریضوں میں سے 68 کی حالت تشویشناک بتائی جاتی ہے۔

سعودی عرب میں کرونا ویکسین مہم شروع کیے جانے سے اب تک 69.5 ملین افراد کو ویکسین دی گئی ہے جس میں 25 ملین کو تمام خوراکیں دی جا چکی ہیں۔