قومی کرکٹ ٹیم کے کپتان بابر اعظم نے کہا ہے کہ ایشیاکپ میں اچھی کارکردگی دکھانے کی کوشش کریں گے اورنیپال سمیت کسی بھی ٹیم کو آسان نہیں لیں گے۔
ملتان میں میڈیا سے گفتگو کرتے ہوئے بابر اعظم نے کہا کہ آخر بار ملتان میں ٹیسٹ اور ویسٹ انڈیز کے خلاف سیریز کھیلی تھی، جس کا تجربہ خاصہ اچھا رہا تھا۔
انہوں نے کہا کہ حال ہی میں ہونے والی ون ڈے سیریز میں افغانستان کے خلاف ٹیم نے اچھا کھیل پیش کیا، کوشش کریں گے کہ ایشیا کپ میں بھی اچھا کھیلیں، کرکٹ میں کسی ٹیم کو آسان نہیں لے سکتے۔
قومی ٹیم کے کپتان کا کہنا تھا کہ میرے خیال سے پورا ایشیا کپ پاکستان میں ہوتا ہے تو اچھا ہوتا، لیکن اب جو شیڈول ہے اس کے حوالے سے بھی تیار ہیں، ہمارے کوچز نے اورکھلاڑیوں نے شیڈول کے حساب سے تیاری کی ہے۔ اُن کا مزید کہنا تھا کہ ٹریول شیڈول کو دیکھ کر تیاری کی ہے اور ہمارے کھلاڑی ایشیا کپ میں بھی اچھی پرفارمنس دینے کے لیے تیار ہیں۔
