چیئرمین مجلس وحدت مسلمین پاکستان علامہ راجہ ناصر عباس جعفری نے میڈیا سیل سے جاری اپنے بیان میں کہا ہے کہ فلسطینی عوام کی اسرائیلی مظالم کے خلاف مزاحمت کی بھرپور حمایت کرتے ہیں، غیور اور شجاع فلسطینیوں کو اپنی سرزمین کے دفاع کا مکمل حق حاصل ہے، آئے روز نہتے فلسطینیوں پر اسرائیلی درندگی ناقابل قبول ہے، اسرائیلی فضائیہ کے نہتے فلسطینیوں پر حملے بین الاقوامی قوانین کی کھلم کھلا خلاف ورزی ہیں، فلسطینی عوام کے پاس گنوانے کو کچھ نہیں بچا، ہار بزدل صہیونیوں کا مقدر ٹھہرے گی، فلسطینی کاز کو پس پشت ڈال کر اسرائیل سے دوستی کی پینگیں بڑھانے والے مسلم ممالک ہوش کے ناخن لیں، او آئی سی کا مظلوم فلسطینیوں کی حمایت کے لیے کھل کر سامنے آنا وقت کا تقاضا ہے۔
انہوں نے کہا کہ اسرائیل کے لئے نارملائزیشن کی مہم چلانے والے دیکھ لیں آپ ڈوبتی کشتی میں پاکستان کو سوار کرنا چاہتے ہیں، امہ فلسطینی کاز کی حمایت میں اور اسرائیلی جارحیت کے خلاف اپنی خاموشی توڑے، شر پسند صہیونیوں کی طرف سے مسجد اقصیٰ کی بار بار بے حرمتی مسلم حکمرانوں کی ملی غیرت و حمیت کے لیے بہت بڑا سوال ہے۔اسرائیل گزشتہ سال میں دو سو سے زائد بے گناہ فلسطینیوں کو شہید کر چکا ہے، فلسطینوں کی مزاحمت پر اسرائیلی سفاکیت اور بربریت پر خاموش تماشائی عالمی برادری بوکھلاہٹ کا شکار ہو چکی ہے، غاصب صہیونی ریاست کے حق میں بولنے والے برطانوی و فرانسیسی حکمرانوں کو شرم آنی چاہیے، ترکیہ اور مصر کو مصلحت پسندی چھوڑ کر مظلوم فلسطینیوں کی حمایت کرنی چاہیے۔
