انگلش کاؤنٹی ووسٹرشائر اسپن بولر جوش بیکر 20 سال کی عمر میں چل بسے۔ اُن کی موت کی وجہ تاحال معلوم نہ ہوسکی ہے۔
ووسٹرشائر کاؤنٹی کے چیف ایگزیکٹو ایشلے جائلز کا کہنا ہے کہ جوش بیکر کی وفات ہم سب کو افسردہ کرگئی ہے۔ جوش بیکر نے اپنے آخری میچ میں سمرسٹ کے خلاف تین وکٹیں حاصل کی تھیں۔
یاد رہے کہ بائیں بازو کے بلے باز نے 2021 میں فرسٹ کلاس ڈیبیو کیا تھا، انہوں نے تمام فارمیٹس میں 47 میچ کھیلے اور 70 وکٹیں حاصل کیں۔اُن کی وفات پر پاکستانی کھلاڑیوں کی جانب سے بھی افسوس کا اظہار کیا گیا ہے۔
ووسٹرشائر کی جانب سے کھیلنے والے پاکستانی اسپنر اُسامہ میر نے ’ایکس‘ پر اپنی پوسٹ میں کہا کہ جوش بیکر کی وفات سے دکھ اور دھچکا لگا ہے، وہ ایک اچھا انسان اور شاندار کرکٹر تھا، یہ خبر سن کر واقعی بہت صدمہ ہوا۔
سابق پاکستانی کرکٹر عمر گل نے کہا کہ نوجوان جوش بیکر کی موت کے بارے میں سن کر مجھے بہت دکھ ہوا ہے، اس مشکل وقت میں میں ان کے خاندان اور ووسٹرشائر کے ساتھ دلی تعزیت کا اظہار کرتا ہوں، اُن کی یادیں سکون اور حوصلے کا ذریعہ بنیں گی۔
سابق پاکستانی کرکٹر اظہر علی نے لکھا کہ یہ چونکا دینے والی خبر سن کر واقعی دکھ ہوا، جوش ایک شاندار لڑکا تھا، اس کے چہرے پر ہمیشہ مسکراہٹ رہتی تھی۔
حالیہ دنوں میں یارکشائر کاؤنٹی کی قیادت کرنے والے پاکستانی بلے باز شان مسعود نے لکھا کہ (جوش بیکر کی وفات کی خبر سن کر) بہت صدمہ پہنچا، ان کے اہل خانہ اور مرحوم کے لیے نیک تمنائیں۔
