پنجاب کے ضلع ساہیوال میں عوام سے بھرے بازار میں امریکا کے نو منتخب صدر ڈونلڈ ٹرمپ کا ہمشکل انوکھا کھانا بیچنے والا منظر عام پر آگیا۔
مقامی لوگوں کا کہنا ہے کہ کھانا بیچنے والا سلیم بگا نامی شخص ڈونلڈ ٹرمپ سے غیر معمولی مشابہت رکھتا ہے، اور دوسروں کے مقابلے میں زیادہ توجہ حاصل کرکے پیسے کماتا ہے۔
شہری محمد یاسین کا کہنا ہے کہ ہمیں لگتا ہے جیسے ٹرمپ یہاں کھیربیچنے آئے ہیں، مقامی رہائشی سلیم بگا سے میٹھا خریدنے کو ترجیح دیتے ہیں، جو گاہکوں کو متوجہ کرنے کے لیے گانا بھی گاتا ہے۔
انہوں نے کہا کہ گاہکوں کو متوجہ کرنے کے لیے جب سلیم بگا اپنے ٹھیلے پر مختلف گانے گاتا ہے تو ہم اس کے پاس کھچے چلے آتے ہیں۔
سلیم بگا رنگین لکڑی کے ٹھیلے کو سڑک کے ساتھ دھکیلتے ہوئے دودھ کی کھیر فروخت کرتا ہے، اس نے سردی سے بچائو کے لیے شلوار قمیض کے ساتھ سیاہ جیکٹ پہنی ہوتی ہے۔
بگا کو دیکھتے ہی ایک ہجوم اکٹھا ہوتا ہے، وہ مخصوص سنہرے بالوں والی رنگت سے کھیلتا ہے، اور ایک پنجابی گانے کے بول گاتا ہے کہ ”اب تم میرے پاس آؤ میری محبت، دیر نہ کرو، میری آنکھیں انتظار کرتے تھک گئی ہیں۔“
مقامی رہائشی عمران اشرف نے بگا کے ساتھ سیلفی لیتے ہوئے کہا کہ ’’اس کی کھیر واقعی مزیدار ہوتی ہے، ہم اس سے بات کرتے اور سیلفیاں لیتے ہیں، ہم اپنے دوستوں کو بتاتے ہیں کہ ہم نے ٹرمپ کے ساتھ تصاویر لی ہیں۔
کھیر فروش سلیم بگا پوری مارکیٹ اور ساہیوال ضلع میں اپنے آبائی محلے میں بھی لوگوں کی توجہ اور موبائل کیمروں سے بے نیاز ہے۔
سلیم بگا کا کہنا ہے کہ میرا چہرہ ڈونلڈ ٹرمپ سے ملتا جلتا ہے، لوگ میرے ساتھ سیلفی لیتے ہیں، مجھے یہ سب بہت اچھا لگتا ہے۔
انہوں نے کہا کہ ڈونلڈ ٹرمپ اب امریکا کے صدارتی الیکشن جیت چکے ہیں، میں ان کو دعوت دیتا ہوں کہ اب یہاں آئیں اور میری کھیر کھائیں، آپ کو بہت مزہ آئے گا۔
