پاکستان کرکٹ ٹیم کے سابق کپتان شعیب ملک اور اداکارہ ثنا جاوید نے شادی کی نئی تصاویر جاری کردی ہیں۔
شعیب اور ثنا کی شادی گزشتہ برس جنوری میں ہوئی تھی، جس کا اعلان دونوں نے مشترکہ پوسٹ کے ذریعے 20 جنوری کو کیا، جوڑے نے دو تصاویر شیئر کیں اور پوسٹ کے کیپشن میں ’الحمداللہ‘ لکھا اور ساتھ ہی قرآن شریف کی آیت لکھی۔
اپنی شادی کو ایک سال مکمل ہونے پر ثناجاوید نے شادی کی مختلف تقریبات کی کچھ تصاویر انسٹاگرام پر شیئر کی ہیں۔
اداکارہ نے کیپشن میں لکھا ’شادی کا ایک سال مبارک ہو میری محبت، زندگی آپ کے ساتھ انتہائی خوبصورت ہے‘۔
تصاویر میں نکاح کی تقریب کے علاوہ مایوں کی تقریب کی تصویر بھی شامل ہے، جس میں شعیب اور ثنا نے گیندے اور سفید پھولوں کا ہار پہنا ہوا ہے۔
تصاویر میں ثنا جاوید کے ہاتھوں اور پاؤں پر مہندی لگی ہے جس سے اندازہ ہوتا ہے کہ یہ شادی سے ایک دو دن پہلے لی گئی تصویریں ہیں۔
واضح رہے کہ جوڑے کی شادی 17 جنوری 2024 کو کراچی میں ہوئی تھی۔
