دبئی کرکٹ اسٹیڈیم میں کھیلے جانے والے آئی سی سی چیمپئنز ٹرافی کے سنسنی خیز مقابلے میں بھارت نے نیوزی لینڈ کو جیت کے لیے 250 رنز کا چیلنج دے دیا۔ کیوی کپتان مچل سینٹنر نے ٹاس جیت کر پہلے فیلڈنگ کا فیصلہ کیا، جس کے بعد بھارتی بیٹنگ لائن اپ مشکلات کا شکار رہی۔
بھارتی ٹیم کو آغاز میں ہی دھچکا لگا جب شبھ من گل صرف 2 رنز بنا کر 15 کے مجموعی اسکور پر پویلین لوٹ گئے۔ اس کے بعد روہت شرما (15 رنز) اور ویرات کوہلی (11 رنز) بھی جلدی آؤٹ ہو گئے، جس سے ٹیم دباؤ میں آ گئی۔ تاہم، شریاس ائیر نے ذمہ داری سنبھالی اور 79 رنز کی شاندار اننگز کھیلی، جس میں 2 چھکے اور 4 چوکے شامل تھے۔ اکشر پٹیل نے بھی 42 رنز کی عمدہ اننگز کھیلی، مگر وہ بھی لمبی اننگز نہ کھیل سکے۔
دیگر بلے بازوں میں کے ایل راہول 23، رویندرا جدیجا 16 اور ہاردک پانڈیا 45 رنز بنا کر نمایاں رہے۔ بھارت کی اننگز آخری گیند پر 249 رنز پر سمٹ گئی، جب محمد شامی 5 رنز بنا کر آؤٹ ہوئے۔
ٹاس کے بعد نیوزی لینڈ کے کپتان مچل سینٹنر کا کہنا تھا کہ پچ بیٹنگ کے لیے سازگار لگ رہی ہے اور ان کی ٹیم بھارت کو جلد آؤٹ کرنے کی کوشش کرے گی۔ دوسری جانب، بھارتی کپتان روہت شرما نے کہا کہ وہ پہلے بیٹنگ کرنا ہی چاہتے تھے، کیونکہ اسپنرز نے گزشتہ میچ میں اہم کردار ادا کیا تھا۔
واضح رہے کہ دونوں ٹیمیں پہلے ہی سیمی فائنل میں پہنچ چکی ہیں، جہاں آسٹریلیا اور جنوبی افریقہ بھی اپنی جگہ بنا چکے ہیں۔ پہلا سیمی فائنل 4 مارچ جبکہ دوسرا 5 مارچ کو ہوگا۔
