آسٹریلوی کرکٹر ڈیوڈ وارنر کی بھارتی سنیما، خصوصاً الو ارجن کی فلموں سے محبت کسی سے پوشیدہ نہیں۔ کورونا وبا کے دوران وہ اکثر اپنے اہلِ خانہ کے ساتھ الو ارجن کے مشہور گانوں اور ڈائیلاگز پر ویڈیوز شیئر کرتے رہے۔
اب وارنر اپنے فلمی کیریئر کی شروعات کرنے جا رہے ہیں، مگر حیران کن طور پر یہ ڈیبیو الو ارجن کی فلم میں نہیں ہوگا، جیسا کہ ان کے مداح توقع کر رہے تھے۔
بھارتی میڈیا رپورٹس کے مطابق میتری موویز کے پروڈیوسر روی شنکر نے انکشاف کیا ہے کہ ڈیوڈ وارنر تیلگو فلم "رابن ہُڈ" میں ایک خاص کردار نبھاتے نظر آئیں گے، جس کی ہدایت کاری وینکی کُڈومُلا نے کی ہے اور فلم میں نیتن اور سری لیلا مرکزی کردار ادا کر رہے ہیں۔
ایونٹ کے دوران، جب اینکر نے فلم کی تفصیلات پوچھی تو پروڈیوسر پہلے تذبذب کا شکار نظر آئے، مگر نیتن کے اشارے پر انہوں نے انکشاف کیا کہ وارنر فلم میں ایک خاص کیمیو (مہمان کردار) ادا کریں گے۔
واضح رہے کہ گزشتہ سال ستمبر میں آسٹریلوی میڈیا نے ڈیوڈ وارنر کی ایک بھارتی فلم کے سیٹ سے تصاویر لیک کی تھیں، جس میں انہیں میلبرن میں شوٹنگ کے دوران سفید شرٹ میں دیکھا گیا تھا۔
