سال 2025 کا پہلا سورج گرہن 29 مارچ کو ہوگا۔ یہ جزوی سورج گرہن یورپ، ایشیا، شمالی و جنوبی امریکا اور بحر اوقیانوس کے کچھ حصوں میں دیکھا جاسکے گا۔ تاہم، پاکستان اور بھارت میں یہ نظر نہیں آئے گا۔
ماہرین فلکیات کے مطابق سورج گرہن اس وقت ہوتا ہے جب چاند سورج اور زمین کے درمیان آجاتا ہے جس کے نتیجے میں کچھ وقت کے لیے سورج کا کچھ یا مکمل حصہ نظر نہیں آتا۔
سورج گرہن کی چار اقسام ہیں: مکمل جزوی رِنگ آف فائر (Annular) اور ہائبرڈ۔ مکمل گرہن میں چاند سورج کو مکمل طور پر ڈھانپ لیتا ہے جبکہ جزوی گرہن میں سورج کا کچھ حصہ ہی چاند کی اوٹ میں آتا ہے۔
رِنگ آف فائر گرہن تب ہوتا ہے جب چاند زمین سے زیادہ فاصلے پر ہو اور وہ سورج کو مکمل طور پر نہیں چھپا سکتا جس کی وجہ سے سورج کے گرد ایک روشن دائرہ نظر آتا ہے۔ ہائبرڈ سورج گرہن وہ ہوتا ہے جو کچھ علاقوں میں مکمل اور کچھ میں جزوی دکھائی دیتا ہے۔
رواں سال کا دوسرا سورج گرہن 21 ستمبر کو ہوگا۔
