صدر مملکت آصف علی زرداری نے کہا کہ پاکستان میں ایک آزاد اور ذمہ دار پریس کے فروغ کے عزم کا اعادہ کرتے ہیں۔
صدر آصف علی زرداری نے آزادی صحافت کے عالمی دن پر پیغام میں کہا کہ غزہ اور فلسطین جیسے جنگ زدہ علاقوں میں رپورٹنگ کے دوران جانیں گنوا دینے والے صحافیوں کو خراج تحسین پیش کرتے ہیں، دستورِ پاکستان کا آرٹیکل 19 چند ضوابط کے تحت آزادی اظہار اور آزاد صحافت کی ضمانت دیتا ہے۔
صدر مملکت نے کہا کہ میڈیا مکالمے کے فروغ، سماجی، اقتصادی اور ماحولیاتی مسائل اجاگر کرنے کیلئے ناگزیر ہے، بدعنوانی بے نقاب کرنے، پسماندہ طبقات کیلئے آواز بلند کرنے میں میڈیا کا اہم کردارہے، ہم نے صحافیوں کے تحفظ اور فلاح و بہبود کے لئے بہت سے اقدامات کئے ہیں۔
ان کا مزید کہنا تھا کہ صحافیوں کو محفوظ اور سازگار ماحول فراہم کرنے کیلئے مزید اقدامات کی ضرورت ہے، ایسا ماحول جہاں صحافی خوف و ہراس کے بغیر اپنے فرائض سرانجام دے سکیں وقت کی ضرورت ہے، میڈیا اعلیٰ صحافتی معیار، خبروں میں درستگی اور پیشہ ورانہ مہارت برقرار رکھے۔
آصف علی زرداری نے کہا کہ جعلی خبروں، غلط معلومات، سنسنی کے ماحول میں میڈیا کی ذمہ داری اور بھی بڑھ گئی ہے، شہریوں کے حقوق، ذمہ داریوں، سماجی و اقتصادی مسائل بارے آگاہی پیدا کرنے میں میڈیا کا اہم کردار ہے، جمہوری عمل میں عوام کی شرکت کی حوصلہ افزائی کیلئے میڈیا کا کردار اہم ہے۔
صدر مملکت کا مزید کہنا تھا کہ پریس کو عوام اور سرکاری اداروں کے درمیان پل کا کردار ادا کرنا چاہئے، میڈیا کو بے آواز لوگوں کی آواز بننا چاہئے، آزادی صحافت جمہوریت کا ایک لازمی عنصر ہے، آئیے آزادی صحافت کے تحفظ اور فروغ کے عزم کی تجدید کریں۔
انہوں نے کہا کہ امید ہے کہ حکومت آزادی صحافت، صحافیوں کے تحفظ، وقار اور آزادی کیلئے کام جاری رکھے گی، امید ہے کہ ہمارا میڈیا قومی اور عالمی اہمیت کے مسائل پر آگاہی فراہم کرنے میں اپنا کردار ادا کرتا رہے گا۔
