واشنگٹن: سابق امریکی صدر ڈونلڈ ٹرمپ نے فیس بک اور ٹوئٹر کو ٹکر دینے کے لیے اپنا ذاتی ایپ لانچ کرنے کا اعلان کر دیا۔
تفصیلات کے مطابق ٹرمپ نے ٹوئٹر اور فیس بک کو ٹکر دینے کے لیے ’ٹروتھ‘ نامی سوشل میڈیا پلیٹ فارم بنانے کا اعلان کر دیا ہے۔
امریکی انتخابات سے قبل ٹوئٹر نے اشتعال انگیز ٹوئٹس کرنے پر جنوری میں ٹرمپ کا اکاؤنٹ ڈیلیٹ کر دیا تھا، جس کے بعد سابق امریکی صدر نے سوشل میڈیا ویب سائٹس کے خلاف محاذ بنا لیا ہے۔
ٹرمپ میڈیا اینڈ ٹیکنالوجی گروپ کا کہنا ہے کہ ان کا سوشل نیٹ ورک سیلیکون ویلی کی بڑی ٹیک کمپنیوں کے خلاف لڑے گا، انھوں نے الزام لگایا کہ ان کمپنیوں نے امریکا میں مخالف آوازوں کو خاموش کرنے کے لیے یک طرفہ طاقت کا استعمال کیا ہے۔
ٹرمپ کا کہنا تھا کہ ہم ایک ایسی دنیا میں رہتے ہیں جہاں ٹوئٹر پر طالبان کی موجودگی تو ہے لیکن عوام کے پسندیدہ امریکی صدر کو خاموش کرا دیا گیا ہے۔
یہ سوشل نیٹ ورک اگلے ماہ بیٹا لانچ کے ذریعے جب کہ 2022 کی پہلی سہ ماہی میں مکمل متعارف کرا دیا جائے گا۔
یاد رہے کہ ٹویٹر، فیس بک، انسٹاگرام اور یوٹیوب نے 6 جنوری کو کیپٹل ہل کے باہر پیش آنے والے واقعے کے بعد ٹرمپ کے اکاؤنٹس عارضی طور پر بند کیے تھے، بعد ازاں انھیں مستقل بند کرنے کا اعلان کیا گیا۔
2 اکتوبر کو ٹرمپ نے ٹویٹر اکاؤنٹ بحال کروانے کے لیے عدالت سے رجوع کیا تھا، فلوریڈا کی ضلعی عدالت میں دائر درخواست میں استدعا کی گئی ہے کہ ٹویٹر انتظامیہ کے فیصلے کو کالعدم قرار دے کر حکم امتناع جاری کیا جائے۔
