اسلام آباد: حکومت اورپٹرولیم ڈیلرز ایسوسی ایشن کے درمیان معاملات طے پاگئے ہیں جس کے بعد ملک میں پٹرول پمپس کی بندش کا خطرہ ٹل گیا ہے۔
وزارت پٹرولیم اسلام آباد میں حکومت کی طرف سے وزیر پٹرولیم حماد اظہر، سیکرٹریپٹرولیم، ڈی جی آئل اور چیئرمین اوگرا نے پٹرولیم ڈیلرز ایسوسی ایشن کے وفد سے تفصیلی مذاکرات کیے۔
6گھنٹے تک جاری رہنے والے مذاکرات میں حکومت پٹرولیم ڈیلرز کے 6 فیصد تک ڈیلرز مارجن بڑھانے پر رضا مند ہوگئی۔
ڈیلرز مارجن بڑھانے کے فیصلے پر عمل درآمد کے لئے سیکرٹری پٹرولیم کی سربراہی میں کمیٹی بھی تشکیل دے دی گئی۔ جو کابینہ اور ای سی سی سے ڈیلرز مارجن میں اضافے کی منظوری لے کر ڈیلرز کو آگاہ کرے گی۔
ڈیلرز ایسوسی ایشن کے عہدیدارام کا کہنا تھا کہ عارضی طور پر ہڑتال کی کال واپس لے لی ہے پانچ نومبر کو اب ہڑتال نہیں ہوگی لیکن اگر حکومت نے 17 نومبر تک اپنے وعدے پر عمل درآمد نہ کروایا تو 20 نومبر سے ملک بھر میں غیر معینہ مدت کے لئے ہڑتال کردیں گے۔
