بالی ووڈ کے بادشاہ شارخ خان کا شمار ان اداکاروں میں ہوتا ہے جو اکثر سوشل میڈیا پر اپنے مداحوں سے رابطے میں رہتے ہیں لیکن پچھلے کچھ عرصے سے کنگ خان سوشل میڈیا سے بالکل غائب تھے۔
تاہم گزشتہ روز شاہ رخ خان کافی عرصے بعد سوشل میڈیا پر سرگرم نظر آئے اور اپنی فلم ’’پٹھان‘‘ کے ٹیزر ریلیز کا اعلان کیا۔
بعد ازاں انہوں نے ٹوئٹر پر ’’آسک سیشن‘‘ کے دوران مداحوں کی جانب سے پوچھے جانے والے سوالوں کے دلچسپ جوابات دئیے۔
ٹوئٹر پر ’’آسک سیشن‘‘ کے دوران مداح کنگ خان سے کافی عجیب و غریب سوالات بھی پوچھتے ہیں لیکن شاہ رخ خان اپنے ہر مداح کے سوال کا جواب ضرور دیتے ہیں۔
دیوانگ تیواری نامی مداح نے شاہ رخ خان کو اپنا مسئلہ بتایا ’’سر پڑھائی کیسے کروں اچھے سے من نہیں لگتا؟ شاہ رخ خان نے مداح کے اس سوال کا انتہائی دلچسپ جواب دیتے ہوئے کہا ’’دماغ سے پڑھائی کرنے کی کوشش کر یہ فارمولا کام کرے گا، من پیار کے لیے رکھ‘‘۔
واضح رہے کہ شاہ رخ خان نے گزشتہ روز اپنی آنے والی فلم ’’پٹھان‘‘ کا ٹیزر مداحوں کے ساتھ شیئر کیا تھا۔ فلم اگلے سال 25 جنوری 2023 کو ریلیز ہوگی۔ فلم میں شاہ رخ خان کے ساتھ دپیکا پڈوکون اور جان ابراہم بھی اہم کرداروں میں نظر آئیں گے۔
