پشاور: پیپلز پارٹی نے دعویٰ کیا ہے کہ خیبر پختونخوا میں پی ٹی آئی کے 45 ایم پی ایز ہم سے رابطے میں ہیں، مرکز کے بعد صوبے میں بھی جلد عدم اعتماد کی تحریک لائیں گے۔
پیپلز پارٹی کے صوبائی صدر نجم الدین خان نے لواری ہاؤس دیر بالا میں نیوز کانفرنس کے دوران کہا کہ خیبر پختونخوا اسمبلی میں پی ٹی آئی کے 45 ارکان ہم سے رابطے میں ہیں اور مرکز کے بعد صوبے میں بھی جلد عدم اعتماد کی تحریک لائیں گے۔
صوبائی صدر پیپلز پارٹی نے کہا کہ اپوزیشن ایک پیج پر ہے اور ہم نے نااہل حکومت سے قوم کو نجات دلانے کے لیے کمر کس لی ہے۔
انہوں نے کہا کہ پی ٹی آئی کے کارکنان اور کرم فرما کھول کر سن لیں، جیالے اینٹ کا جواب پتھر سے دینا خوب جانتے ہیں، پیپلز پارٹی کے کارکنوں نے بھی چوڑیاں نہیں پہن رکھیں۔ انھوں نے اسلام آباد میں سندھ ہاؤس پر حملے پر ریاستی اداروں کی خاموشی کو افسوس ناک اور معنی خیز قرار دیا اور کہا کہ خدانخواستہ یہ خاموشی کسی بڑے طوفان کا پیش خیمہ ثابت ہوسکتی ہے۔
نجم الدین خان نے کہا کہ عدلیہ، مقننہ، انتظامیہ اور میڈیا کسی خاص جماعت کے آلہ کار بننے کے بجائے اپنی قومی اور پیشہ ورانہ ذمہ داریاں پوری کریں، اگر ذمہ دار افراد نشانہ عبرت نہ بنے تو جو آج سندھ کے ساتھ ہوا یہ کل ریاست کی کسی بھی اکائی کے ساتھ ہوسکتا ہے۔
اس موقع پر صوبائی جنرل سیکریٹری شجاع خان اور سیکریٹری اطلاعات امجد آفریدی بھی موجود تھے۔
