انسٹا گرام میں ایک ایسا اضافہ کیا جا رہا ہے جو اب تک اس فوٹو شیئرنگ ایپ میں پہلے کبھی دیکھنے میں نہیں آیا تھا۔
جی ہاں واقعی انسٹا گرام کی جانب سے ایپ میں ڈس لائیک بٹن کی آزمائش کی جا رہی ہے۔
کمپنی کی جانب سے تصدیق کی گئی ہے کہ کمنٹس کے لیے اس نئے بٹن کی آزمائش کی جا رہی ہے۔
اس بٹن یا فیچر کے ذریعے صارفین دیگر کو سگنل دے سکیں گے کہ ان کا کمنٹ انہیں پسند نہیں آیا یا ان کے خیال میں یہ پوسٹ سے متعلق نہیں۔
یہ فیچر انسٹا گرام فیڈ پوسٹس اور ریلز دونوں میں دیکھنے میں آیا ہے اور فی الحال محدود افراد کو دستیاب ہے۔
انسٹا گرام کے سربراہ ایڈم موسیری نے تھریڈز میں ایک پوسٹ میں بتایا کہ کمپنی کی جانب سے ڈس لائیک کاؤنٹ کو ظاہر نہیں کیا جائے گا اور کسی کو علم نہیں ہوگا کہ آپ نے کسی کمنٹ کو ڈس لائیک کیا ہے۔
انہوں نے بتایا کہ بتدریج ڈس لائیکس کے ذریعے کمنٹس کی رینکنگ کی جائے گی۔
ان کا کہنا تھا کہ آپ میں سے کچھ افراد نے کمنٹس میں ایک نئے بٹن کو دیکھا ہوگا جس کی آزمائش ہماری جانب سے کی جا رہی ہے۔
ایڈم موسیری کے مطابق اس بٹن کے ذریعے آپ اپنا نام ظاہر کیے بغیر یہ عندیہ دے سکیں گے کہ آپ کو مخصوص کمنٹ پسند نہیں آیا۔
