ایڈوبی نے اعلان کیا کہ وہ پہلی بار اپنے فوٹوشاپ ایپ کو موبائل فونز پر متعارف کروا رہا ہے، جس میں ایک مفت اور دوسرا ادائیگی والا ورژن بھی پیش کیا جائے گا۔
ایڈوبی کا ڈیجیٹل امیج سافٹ ویئر 1990 میں پہلی بار ریلیز کیا گیا تھا، یہ اب اتنا معروف ہوچکا ہے کہ اب اس کا استعمال فوٹوز کی ایڈیٹنگ کا حصہ بن چکا ہے اور اس کا سب سے کم قیمت والا ورژن پہلے ایپل کے آئی پیڈ کے لیے 9.99 ڈالر فی مہینہ سبسکرپشن تھا۔
حکام نے بتایا کہ اب ایڈوبی نے ایپل کے آئی فون کے لیے مفت ورژن جاری کیا ہے، جبکہ اینڈرائیڈ ایپ بھی جلد دستیاب ہوگی، ایڈوبی ایک پریمیم ورژن پیش کرے گا جس کی قیمت 7.99 ڈالرز فی ماہ ہوگی، جس میں مزید خصوصیات شامل ہوں گی، جیسا کہ زیادہ کلاؤڈ اسٹوریج تک رسائی اور ویب بیسڈ فوٹوشاپ ورژن، جو بڑے اسکرینز پر ایڈیٹنگ کی سہولت فراہم کرے گا۔
انہوں نے بتایا کہ یہ قدم اس وقت اٹھایا گیا جب ایپل اور الفابیٹ کی گوگل کے موبائل آپریٹنگ سسٹمز نے مفت میں فوٹوشاپ کی کئی طویل مدتی خصوصیات کو نقل کیا ہے، جیسا کہ تصویر کے رنگوں کو ایڈجسٹ کرنا یا کچھ خلل ڈالنے والی اشیاء کو ہٹانا شامل ہے۔
ایڈوبی کا تخلیقی پیشہ ورانہ سافٹ ویئر ابھی بھی اس کی فروخت کا نصف سے زیادہ حصہ بناتا ہے، اس وقت جب کمپنی نے دسمبر میں 2025 کی آمدنی کی پیشگوئی کی تھی، جو وال اسٹریٹ کی توقعات سے کم تھی۔
ایڈوبی کی تخلیقی پیشہ ورانہ ایپس کی پروڈکٹ مارکیٹنگ کی نائب صدر نے کہا کہ کمپنی کا فوکس نوجوان صارفین کو اپنی طرف متوجہ کرنا ہے، جن کے فون ان کے بنیادی کیمرہ اور ایڈیٹنگ ڈیوائس ہیں، جب انہیں فون کے آپریٹنگ سسٹم سے زیادہ ٹولز کی ضرورت ہوتی ہے۔
ان کا کہنا تھا کہ مفت ورژن میں بھی فوٹوشاپ ایپ میں خصوصیات ہوں گی جیسا کہ تصویر کو مختلف تہوں میں تقسیم کرنا، اس کے کچھ حصوں کو ماسک کرنا اور متن شامل کرنا شامل ہے، جنہیں پوڈ کاسٹ کے کور شاٹس، اسٹریمنگ میوزک پلے لسٹس یا یوٹیوب ویڈیوز کے لیے استعمال کیا جاسکتا ہے۔
سبرا منیم نے کہاکہ ”ہم نے اپنے ہدف صارفین کے ساتھ براہ راست ٹیسٹنگ میں بہت وقت اور توانائی صرف کی، جو کہ اگلی نسل کے تخلیق کار ہیں جو اپنا زیادہ تر کام اپنے فون پر کرتے ہیں۔ یہ ان کی ذاتی تخلیقی صلاحیت کا اظہار کرنے کا طریقہ ہے، اور ایپلیکیشن واقعی ان کے لیے بنائی گئی ہے۔“
