وفاقی وزیر توانائی اویس لغاری نے پاکستان کے پہلے فاسٹ الیکٹرک وہیکل (ای وی) چارجنگ اسٹیشن کا افتتاح کر دیا۔ اس موقع پر انہوں نے کہا کہ ای وی پاکستان کا مستقبل ہے اور حکومت گرین انرجی کے فروغ کے لیے پرعزم ہے۔
اویس لغاری نے بتایا کہ الیکٹرک چارجنگ یونٹ کی قیمت 71 روپے سے کم کر کے 39 روپے کر دی گئی ہے اور بجلی کے نرخوں میں مزید کمی کی جائے گی۔ انہوں نے کہا کہ پرائیویٹ سیکٹر کو بھی ملکی ترقی میں اپنا کردار ادا کرنا ہوگا۔
ان کا مزید کہنا تھا کہ ماضی کے مقابلے میں مستقبل میں توانائی کا شعبہ زیادہ صاف اور گرین ہوگا۔
انہوں نے میڈیا سے گفتگو میں بجلی کی قیمتوں میں کمی کی یقین دہانی کراتے ہوئے کہا کہ اگلے چند دنوں میں ان کی باتیں سچ ثابت ہوں گی۔
اویس لغاری نے سابقہ حکومت پر تنقید کرتے ہوئے کہا کہ ہم زبان کے پکے ہیں، ہماری زبان پچھلی حکومت جیسی نہیں ہے۔
انہوں نے مزید کہا کہ وزیراعظم جلد قوم کو اچھی خبر سنائیں گے اور میڈیا میں بجلی کی قیمتوں میں کمی نہ ہونے کی خبریں بے بنیاد ہیں۔
