واٹس ایپ نے اپنے صارفین کے لیے ایک نیا فیچر متعارف کرانے کا فیصلہ کیا ہے جو کالنگ کے تجربے کو مزید بہتر بنائے گا۔ ایک رپورٹ کے مطابق، یہ فیچر ابھی بیٹا ورژن میں کچھ صارفین کے لیے دستیاب ہے۔
نئے اپڈیٹ کے تحت، واٹس ایپ میں انفرادی اور گروپ چیٹس کے لیے ایک نیا کال مینیو متعارف کرایا جا رہا ہے، جو چیٹ باکس کے ٹاپ پر نظر آئے گا۔ اس تبدیلی کے بعد، چیٹ ونڈو سے وائس اور ویڈیو کال کے بٹن ہٹا دیے جائیں گے اور انہیں ایک ہی بٹن میں ضم کر دیا جائے گا۔
جب صارف اس نئے بٹن پر کلک کرے گا، تو ایک مینیو پوپ اپ ہوگا، جس میں وہ وائس یا ویڈیو کال میں سے کسی ایک کا انتخاب کرسکے گا۔ اس کے ساتھ، صارفین کو فوری طور پر کال لنک بنانے اور شیئر کرنے کا آپشن بھی ملے گا، جس سے کسی کو کال میں مدعو کرنا مزید آسان ہو جائے گا۔
مزید برآں، اس فیچر کے ذریعے صارفین کسی بھی واٹس ایپ گروپ میں مخصوص افراد کو منتخب کرکے کال کرسکیں گے، جو پہلے ممکن نہیں تھا۔ اس سے قبل، دسمبر 2024 میں واٹس ایپ نے ویڈیو اور آڈیو کالنگ کو مزید بہتر بنانے کے لیے کچھ اہم اپڈیٹس متعارف کرائے تھے، جن میں ویڈیو کالنگ ایفیکٹس اور ڈیسک ٹاپ ورژن میں کالنگ کا نیا تجربہ شامل تھا۔
