پاکستان کرکٹ بورڈ نے پی ایس ایل کی تاریخ میں پہلی مرتبہ ملک بھر میں ٹرافی ٹور کا اعلان کر دیا۔ پی سی بی کے اعلامیے کے مطابق، یہ ٹور 11 شہروں پر مشتمل ہوگا اور حیدرآباد اور کراچی سے آغاز کرے گا۔ لومینارا ٹرافی 29 مارچ تک مختلف شہروں میں گھومے گی۔
پی ایس ایل کا دسواں ایڈیشن 11 اپریل سے 18 مئی تک کراچی، لاہور، ملتان اور راولپنڈی میں کھیلا جائے گا۔ پہلے مرحلے میں لومینارا ٹرافی 15 مارچ تک حیدرآباد اور کراچی کے مختلف مقامات پر نمائش کے لیے رکھی جائے گی۔
اس کے بعد ٹرافی لاہور، ملتان، بہاولپور، فیصل آباد، پشاور اور اسلام آباد کا رخ کرے گی۔ پی سی بی کے مطابق، دوسرے مرحلے کی تفصیلات مناسب وقت پر جاری کی جائیں گی۔
پی ایس ایل کے سی ای او سلمان نصیر نے کہا کہ ٹرافی ٹور کا مقصد پاکستان کی ثقافت اور کرکٹ کے جذبے کو دنیا بھر میں اجاگر کرنا ہے۔ ان کا کہنا تھا کہ ہمارے شائقین ایچ بی ایل پی ایس ایل کی اصل طاقت ہیں۔
