تحصیل ہجیرہ (آزاد کشمیر) لائن آف کنٹرول (ایل او سی) پر بھارتی فوج کی بلااشتعال گولہ باری کا سلسلہ جاری ہے، جس کے نتیجے میں معصوم اور نہتے کشمیری شہری شدید زخمی ہو گئے جبکہ متعدد مکانات تباہ ہو گئے۔
سیکیورٹی ذرائع کے مطابق، بھارتی فوج نے رات کی تاریکی میں رہائشی علاقوں کو نشانہ بنایا۔ تحصیل ہجیرہ کے علاقے میں محمد رفیق شدید زخمی ہوئے جن کی ٹانگ دو جگہ سے فریکچر ہو گئی۔ ان کے بھتیجے نے میڈیا کو بتایا کہ ’’بھارتی فوج کی اندھا دھند شیلنگ سے میرے چچا بری طرح زخمی ہوگئے، مگر ہمارے حوصلے بلند ہیں، ہم انشاء اللہ مقابلہ کریں گے۔‘‘
زخمی نوجوان معاویہ نواز نے بتایا کہ بھارت نے ظلم کی انتہا کرتے ہوئے رات بھر فائرنگ کی، ’’ایک شیل میری ٹانگ پر لگا، جس سے میری ٹانگ ضائع ہو گئی، کئی مکانات زمین بوس ہو گئے اور کچھ شہریوں کی شہادتیں بھی ہوئیں۔‘‘
عباس پور کے گاؤں لاسری منگ میں بھی شیلنگ سے گھروں کو شدید نقصان پہنچا۔ سیکیورٹی ذرائع کے مطابق، عباس پور میں جانی نقصان کی کوئی اطلاع نہیں، تاہم شہری آبادی کو نشانہ بنانا بین الاقوامی قوانین کی سنگین خلاف ورزی ہے۔
ذرائع کا کہنا ہے کہ بھارت آزاد کشمیر میں شہریوں پر گولہ باری کرکے پاک فوج کے ہاتھوں ملی ہزیمت کا بدلہ لینا چاہتا ہے۔
