واشنگٹن: امریکہ نے پاکستانی بچوں کیلئے کورونا ویکسین کی 16 ملین ڈوزز دینے کا اعلان کر دیا۔
تفصیلات کے مطابق واشنگٹن میں پہلے پاک امریکہ ہیلتھ ڈائیلاگ کے انعقاد کے موقع پر ترجمان امریکی محکمہ خارجہ نے کہا کہ امریکہ پاکستان کو بچوں کیلئے کورونا ویکسین کی 16 ملین خوراک عطیہ کرے گا۔
ترجمان نے کہا کہ امریکہ پاکستان کو 4.6 ملین ڈالر کی 4 موبائل ٹیسٹنگ لیب بھی دے گا، ہیلتھ ڈائیلاگ دونوں ممالک کے مضبوط تعلقات کی مثال ہے، ڈائیلاگ دوطرفہ تعلقات کی وسعت کو اجاگر کرتا ہے۔
واشنگٹن میں پہلے پاک امریکہ ہیلتھ ڈائیلاگ کا انعقاد امریکی محکمہ خارجہ میں ہوا، جس میں وزیر صحت عبدالقادر پٹیل کی قیادت میں پاکستانی وفد نے شرکت کی، سفیر مسعود خان بھی ڈائیلاگ میں موجود تھے جبکہ امریکی وفد کی قیادت اسسٹنٹ ایڈمنسٹریٹر یو ایس ایڈ اتل گاوندے نے کی، یو ایس ڈپارٹمنٹ ہیلتھ اینڈ سروس کے معاون سیکریٹری لوئس پیس بھی موجود تھے۔
ہیلتھ ڈائیلاگ میں فریقین نے مختلف شعبوں میں مشترکہ اہداف تک پہنچنے کے لیے ایکشن پلان تشکیل دیا۔ڈائیلاگ شعبہ صحت میں تعاون برقرار اور مضبوط کرنے کے لیے ایک فریم ورک ہے، ڈائیلاگ میں پاکستانی سی ڈی سی کے قیام، حفاظتی ٹیکوں، کرونا وبا، غیر متعدی امراض پر گفتگو کی گئی۔
