پاکستان میں تعینات کرغزستان کے سفیر اولان بیگ نے کہا ہے کہ بشکیک میں پاکستانی طلبہ پر حملے سوشل میڈیا پر جعلی مہم کا نتیجہ تھے۔
کرغزستان کے سفیر اولان بیگ نے کہا کہ کچھ شرپسند عناصر نے صرف پاکستانی طلبہ ہی کو نشانہ بنایا، ان شرپسند عناصر کو گرفتار کرکے تحقیقات شروع کی گئی ہیں۔
انہوں نے کہا کہ بنیادی جھگڑا 13 مئی کو مصری اور کرغز طلبہ کے درمیان ہوا مگر کرغزستان میں کسی صورت ایسا واقعہ دوبارہ نہیں ہونے دیا جائے گا۔
کرغز سفیر کا کہنا تھا کہ جھگڑے کی ویڈیوز چند کرغز شرپسندوں نے سوشل میڈیا پر ڈالیں، 18 مئی کو تقریباً 500 کرغز باشندوں نے غیرملکی طلبہ کے خلاف احتجاج کیا، ان مظاہرین میں غیرملکیوں سمیت کچھ شرپسند عناصر نے ہاسٹلز پر دھاوا بول دیا، یہ سب کچھ بہت افسوسناک تھا۔
