کولمبو: سری لنکا کی حکومت کی جانب سے کورونا وبا کے دوران مسلمانوں کی میتوں کو جلانے پر معافی مانگ لی گئی ہے۔
بین الاقوامی خبر رساں ادارے کی رپورٹ کے مطابق سری لنکن حکومت کا کہنا ہے کہ کورونا کے دوران آخری رسومات کی لازمی پالیسی پر کابینہ کی جانب سے معافی نامہ جاری کیا گیا ہے۔
بیان میں کہا گیا ہے کہ ملک میں رائج کیا گیا نیا قانون آخری رسومات یا تدفین کے حق میں ضمانت دے گا تاکہ مستقبل میں مسلمانوں یا دوسرے طبقات کی آخری رسومات کی خلاف ورزی نہ ہو۔
واضح رہے کہ کورونا وبا کے دوران سری لنکا کے صدر گوٹابایا راجپکسے نے جاں بحق مسلمانوں کی تدفین پر پابندی عائد کر دی تھی اور مسلمانوں کی میتوں کو شدید احتجاج کے باوجود نذر آتش کر دیا گیا تھا۔
مسلمانوں کا کہنا تھا کہ انہیں میتوں کو جلانے کے لیے اجازت دینے پر مجبور کیا جا رہا تھا یا پھر اطلاع دیے بغیر ہی مسلمانوں کی میتوں کو جلا دیا گیا تھا۔
عالمی ادارہ صحت کی جانب سے اسلامی رسومات کے مطابق تدفین کو محفوظ قرار دینے کی یقین دہانی کو سری لنکا حکومت نے نظر انداز کیا تھا۔
اقوام متحدہ کی انسانی حقوق کونسل اور دیگر فورمس نے مسلمانوں کی میتیں جلانے پر سری لنکا کی حکومت کو تنقید کا نشانہ بنایا تھا۔
