ترکیہ کے صوبے بالی سیر کے ضلع کریسی کے نواحی علاقے میں گولہ بارود بنانے والی ایک فیکٹری میں خوفناک دھماکے سے پورا علاقہ لرز اُٹھا اور آگ کے شعلے آسمان سے باتیں کرنے لگے۔
عالمی خبر رساں ادارے کے مطابق ترکیہ کے وزیرِ داخلہ علی یرلیکایا نے بتایا کہ گولہ بارود کی فیکٹری میں ہونے والے زور دار دھماکے میں 12 افراد جاں بحق اور 4 زخمی ہونے کی اطلاعات ہیں۔
انہوں نے مزید بتایا کہ قریبی اسپتال میں زخمیوں کو طبی امداد مہیا کی جا رہی ہے جن کی حالت اب خطرے سے باہر ہے۔
وزیر داخلہ نے بتایا کہ گولہ بارود بنانے والی فیکٹری میں ہونے والے دھماکے کی وجہ ابھی معلوم نہیں ہوسکی ہے، تاہم، ان کا کہنا ہے کہ انکوائری کمیٹی تشکیل دیدی گئی ہے۔
انہوں نے اسے ایک حادثہ قرار دیتے ہوئے کہا کہ واقعے میں دہشت گردی کا عنصر نظر نہیں آتا، تاہم، انکوائری جاری ہے۔
