اسلام آباد: آئی ایم ایف کا وفد جائزہ مذاکرات کے لیے پاکستان پہنچ گیا، جہاں وفاقی سیکرٹری خزانہ کی قیادت میں پاکستانی حکام نے ان سے ابتدائی ملاقات کی۔
ذرائع کے مطابق پاکستان اور آئی ایم ایف کے درمیان یہ مذاکرات آئندہ دو ہفتوں تک جاری رہیں گے۔ آئی ایم ایف ٹیم کی قیادت ناتھن پورٹر کریں گے جبکہ پاکستانی وفد کی سربراہی وفاقی وزیر خزانہ محمد اورنگزیب کریں گے۔
مذاکرات کے دوران وزارت خزانہ، ایف بی آر، پاور ڈویژن اور اسٹیٹ بینک کے حکام بھی آئی ایم ایف وفد کے ساتھ تفصیلی گفتگو کریں گے۔
پاکستان مذاکرات میں 7 ارب ڈالر کے قرض پروگرام کی شرائط پر عملدرآمد سے متعلق اپنی رپورٹ پیش کرے گا، جس میں رواں مالی سال کی پہلی ششماہی کی کارکردگی کا جائزہ شامل ہوگا۔ ذرائع کا کہنا ہے کہ زرعی آمدن پر ٹیکس اور پراپرٹی سیکٹر میں ٹیکس اصلاحات سے متعلق بھی بریفنگ دی جائے گی، جبکہ ریٹیلرز کو ٹیکس نیٹ میں شامل کرنے کے حوالے سے پیش رفت سے آگاہ کیا جائے گا۔
مذاکرات کے اختتام پر آئی ایم ایف وفد پاکستان کے لیے 1.1 ارب ڈالر کی قسط جاری کرنے کے بارے میں اپنی سفارشات مرتب کرے گا۔
