مائیکروسافٹ کی انجینئر ابتھال ابو سعد نے الزام عائد کیا ہے کہ کمپنی اسرائیلی فوج کو آرٹیفیشل انٹیلی جنس (اے آئی) ٹیکنالوجی فراہم کر رہی ہیں تاکہ اسے غزہ پر جارحیت میں استعمال کیا جا سکے۔
سماجی رابطے کی ویب سائٹ ایکس پر ایک ویڈیو تیزی سے وائرل ہو رہی ہے، جس میں دیکھا جاسکتا ہے کہ مائیکروسافٹ کی 50 ویں سالگرہ کے حوالے سے ایک تقریب میں مائیکروسافٹ کی انجینئر ابتھال ابو سعد کہہ رہی ہیں کہ مائیکرو سافٹ نے ہمارے خطے میں نسل کشی شروع کی ہے، نسل کشی کا اے آئی کا استعمال بند کرو۔
اس دوران ایک خاتون سیکیورٹی اہلکار انہیں تقریب سے باہر لے جا رہی ہیں، جبکہ باہمت انجینئر ابتھال ابو سعد کہہ رہی ہیں کہ تمہارے ہاتھ خون سے رنگے ہیں، پورے مائیکروسافٹ کے ہاتھ خون آلودہ ہیں، تم لوگ تقریب کیسے کر سکتے ہو؟
انہوں نے مزید کہا کہ مائیکروسافٹ بچوں کو مار رہا ہے، شرم کرو، شرم کرو۔
اس کے ساتھ ہی انہیں تقریب سے باہر نکال دیا جاتا ہے۔
ادھر، باہر میڈیا سے گفتگو کرتے ہوئے ان کا کہنا تھا کہ میرے لیے سب سے بڑا خوف کہ میں اپنی 9 سے 5 کی نوکری چھوڑوں، اور مجھے علم ہوا کہ ہمارے ساتھیوں کی وجہ سے بچے مارے گئے ہیں۔
انہوں نے کہا کہ یہ سوچ میرے دل اور دماغ پر غالب ہے، اسی وجہ سے میں نے بولنے کا فیصلہ کیا، حالانکہ مجھے اس کے نتائج کا اندازہ تھا۔
مائیکروسافٹ کی انجینئر ابتھال ابو سعد کا مزید کہنا تھا کہ لیکن میرے لیے سب سے بڑا خوف غزہ میں نسل کشی میں حصہ لینے کا ہے، مزید کہا کہ میں مائیکروسافٹ کی اس میں شامل ہونے پر پریشان ہوں۔
انہوں نے کہا کہ ہمارے کوڈز بمباری اور سرویلنس میں استعمال ہو رہے ہیں، اس پر مجھے سب سے زیادہ تحفظات ہیں، اور یہ ذاتی نتائج سے بڑھ کر ہیں۔
ایک اور ایکس پوسٹ میں دیکھا جاسکتا ہے کہ ایک اور خاتون نے اپنا تعارف کرواتے ہوئے احتجاج کیا کہ میں مائیکرسافٹ میں کام کرتی ہوں، اور غزہ میں اب تک 50 ہزار سے زائد افراد شہید ہو چکے ہیں، اس دوران اسٹیج پر مائیکروسافٹ کے بانی بل گیٹس بھی موجود ہیں۔
