ہمارے جنگلات کی بحالی۔۔۔۔

ہم جنگلات کے بہت مقروض ہیں۔گذشتہ ایک سال کے دوران ، جنگلات کوویڈ 19 وبائی امراض کے دوران لوگوں کو محفوظ اور صحتمند رکھنے میں مدد فراہم کررہے ہیںبہر حال ، کووڈ۔19 نے اس حقیقت کو مزید واضح کر دیا ہے کہ جانوروں ، لوگوں اور ماحولیات کا آپس میں باہمی ربط ہے۔ابھرتی ہوئی متعدی بیماریوں میں سے تقریبا 70 فیصد ، اور تقریباً تمام حالیہ وبائی بیماریاں، خاص طور پر جنگلی حیات سے پیدا ہوئی ہے۔ جب جنگلات کو چراگاہ کےلئے کھیتوں یا چراگاہوں کو بڑھانے کےلئے کاٹ دیا جاتا ہے ، اور جب دوسری طرف گوشت کی شہری مانگ میں اضافہ ہوتا ہے تو انسانوں ، مویشیوں اور جنگلی حیات کے مابین رابطہ بڑھ جاتا ہے۔ اور اسی طرح اگلی بڑی وبائی بیماری کا خطرہ بھی بڑھ جاتا ہے۔پیغام واضح ہے‘ صحتمند جنگلات کا مطلب صحت مند افراد ہیں۔پھر بھی ہمارے جنگلات خطرے کی زد میں ہیں۔ پچھلے 30 سالوں میں ، ہم جنگلات کی کٹائی اور دیگر مقاصد کیلئے اس زمین کواستعمال کرنے کےذریعہ 420 ملین ہیکٹر جنگل کھو چکے ہیں ، جس میں بنیادی کردار زرعی زمین کے حصول کیلئے جنگلات کی کٹائی کا ہے ۔اس تباہی سے عالمی آبادی کی صحت کو خطرہ ہے ، آب و ہوا میں مضر گیسوں میں اضافہ ہوتا ہے ۔ جس سے پودوں اور جانوروں کے ناپید ہونے کا خطرہ ہوتا ہے اور جنگلات پر منحصر لوگوں کی معاش کو بھی خطرے میں ڈالتا ہے۔تو ہم جنگلات ، اور خود کو صحت مند رکھنے کے لئے کیا کر سکتے ہیں؟ پہلے ، ہمیں ان طریقوں کو روکنے کی ضرورت ہے جو جنگلات کو بڑے پیمانے کاٹ کر زرعی زمین کے حصول کیلئے اختیار کئے جاتے ہیں۔ اس بات کو تسلیم کرتے ہوئے کہ جنگلات کاٹے بغیر بڑھتی ہوئی عالمی آبادی کو کھانا کھلانا ممکن ہے۔دوسرا ، ہمیں جنگلی حیات کی غیرقانونی تجارت کو ختم کرنا ہوگا ، جبکہ اس کو مد نظر رکھنا ہوگا کہ جنگلی جانور لاکھوں مقامی لوگوں اور مقامی برادریوں کےلئے خوراک اور آمدنی کا ایک لازمی ذریعہ ہیں۔تیسرا، صحت مند ماحولیاتی نظام کو دوبارہ سے قائم کرنے کےلئے ہمیں جنگلات اور فطری ماحول کی بحالی میں سرمایہ کاری کرنے کی ضرورت ہے۔فی الحال ، تقریبا دو ارب ہیکٹریعنی چین سے دو گنے سائز کا خطہ ، حد سے زیادہ استعمال ، خشک سالی اور غیر مستحکم جنگلات کے باعث انحطاط کا شکار ہے۔ اچھی خبر یہ ہے کہ ہم بڑے پیمانے پر تلف شدہ جنگلات کو بحال کرسکتے ہیں۔ سہارا اور ساحل انیشی ایٹو کےلئے عظیم گرین وال ، افریقی یونین کے زیرقیادت ، اس کی ایک مثال ہے۔ 2030 تک ، اس کا مقصد افریقہ کے خشک علاقوں میں 100 ملین ہیکٹر رقبے کو مقامی درختوں کی اقسام اور پودوں کی بحالی ، سبزے میں اضافہ جبکہ 250 ملین ٹن کاربن الگ کرنے اور 10 ملین سبز روزگار پیدا کرناہے۔اور عالمی سطح پر اہم اہداف پہلے ہی طے کرلیے گئے ہیں: بون چیلنج نے 2030 تک 350 ملین ہیکٹر کی بحالی کا مطالبہ کیا ہے ، اب تک ، 60 سے زائد ممالک اور اداروں نے 210 ملین ہیکٹر ضائع شدہ رقبے کی بحالی کا عہد کیا ہے۔تاہم ، ہمیں اہداف کو پورا کرنے اور وعدوں کو عملی جامہ پہنانے کےلئے رفتار کو تیز کرنے کی ضرورت ہے۔اقوام متحدہ کے ماحولیاتی نظام کی بحالی سے متعلق سال کا آغا زہوچکا ہے اور یہ ایک موقع ہے کہ سینکڑوں لاکھوں ہیکٹر رقبے میں جنگلات کی بحالی کو اجاگر کیا جاسکے ، زمینوں کو سرسبز بنایا جاسکے۔ یہ بہت سے لوگوں کیلئے ماحول دوست روزگار اور آمدنی کے امکانات سے فائدہ اٹھانے کا ایک موقع فراہم کرتا ہے اور ساتھ ہی کوویڈ 19 وبائی مرض سے متاثر شدہ معیشت کی بحالی میں بھی مدد کرسکتا ہے۔ہمیں یہ بھی یاد رکھنا چاہئے کہ ہر درخت کی اپنی اہمیت ہوتی ہے۔ چھوٹے پیمانے پر پودے لگانے اور بحالی کے منصوبے انسانی صحت پر مثبت اثر ڈال سکتے ہیں۔ شہری ہریالی صاف ستھری ہوا پیدا کرتی ہے ، سایہ فراہم کرتی ہے اور شہروں میں لوگوں کی ذہنی اور جسمانی تندرستی کو فائدہ پہنچاتی ہے۔ ہم میں سے ہر ایک کے پاس موقع ہے کہ مائیکرو سطح پر ، پچھواڑے سے لے کر برادری کے باغات تک اس میں حصہ لیں اور اپنے جنگلات کی بحالی اور ہم سب کے لئے ایک صحت مند دنیا بنانے کے لئے نئی شروعات کا آغاز کریں۔ (بشکریہ دی نیوز،تحریر:ماریہ ہیلینا سیمیڈو، ترجمہ:ابولحسن امام)