پاکستان کے نوجوان بیٹر صائم ایوب نے جنوبی افریقا کے خلاف پہلے ون ڈے میں شاندار سنچری اسکور کرکے ویسٹ انڈیز کے سابق کپتان برائن لارا کا 31 سال پرانا منفرد ریکارڈ توڑ دیا۔
یہ میچ جنوبی افریقا کے شہر پارل میں کھیلا گیا، جہاں پاکستان نے میزبان ٹیم کو 3 وکٹوں سے شکست دی۔ جنوبی افریقا کے 240 رنز کے ہدف کے تعاقب میں صائم ایوب نے 109 رنز کی شاندار اننگز کھیلی۔
22 سالہ صائم ایوب ون ڈے کرکٹ میں جنوبی افریقا کے خلاف ہدف کے تعاقب میں سنچری اسکور کرنے والے دنیا کے کم عمر ترین کھلاڑی بن گئے ہیں۔ اس سے قبل یہ ریکارڈ برائن لارا کے پاس تھا، جنہوں نے 1993 میں 23 سال اور 297 دن کی عمر میں جنوبی افریقا کے خلاف ہدف کے تعاقب میں سنچری اسکور کی تھی۔
پاکستان نے اس جیت کے ساتھ 3 ون ڈے میچز کی سیریز میں 1-0 کی برتری حاصل کرلی ہے۔ سیریز کا دوسرا میچ کل کھیلا جائے گا۔
