اسلام آباد: وفاقی حکومت نے ملک کی برآمدات اور براہ راست غیر ملکی سرمایہ کاری میں اضافہ کرنے کے لیے تجارتی ڈپلومیسی کو تیز کرنے کا فیصلہ کیا ہے۔ اس ضمن میں مختلف ممالک میں ٹریڈ افسران تعینات کیے جائیں گے تاکہ پاکستان کی تجارت کو فروغ دیا جا سکے۔
وزارت تجارت کے ذرائع کے مطابق، حکومت نے تجارتی سفارتی کوششوں کو تیز کرنے کا فیصلہ کیا ہے۔ اس فیصلے کے تحت ملائیشیا، چین، سعودی عرب، عراق اور عمان میں ٹریڈ افسران تعینات کیے جائیں گے۔ یورپ میں ہنگری اور یونان میں بھی تجارتی افسران کی خدمات حاصل کی جائیں گی، جبکہ افریقہ میں تنزانیہ اور موزمبیق میں بھی ٹریڈ افسران تعینات کیے جائیں گے تاکہ تجارت کو بڑھایا جا سکے۔
ذرائع نے مزید بتایا کہ تجارتی خسارے کو کم کرنے کے لیے نئی ٹیرف لائنز پر کام جاری ہے۔ اس کے علاوہ، چین میں ٹریڈ افسران کے ساتھ سپورٹ افسران کی تعیناتی پر بھی غور کیا جا رہا ہے۔ اسی طرح، دیگر اہم ممالک میں کمرشل افسران کی تقرری کی بھی منصوبہ بندی کی جا رہی ہے۔
مزید برآں، مالی سال 2023-24 کے دوران پاکستان کی برآمدات 30 ارب 60 کروڑ ڈالر تک پہنچ گئیں، جبکہ گزشتہ مالی سال کے دوران پاکستان کی درآمدات 53 ارب 10 کروڑ ڈالر رہی تھیں۔ اس حساب سے ملک کا تجارتی خسارہ 22.5 ارب ڈالر تک کم ہو گیا ہے، جو کہ 5.4 ارب ڈالر کی کمی کو ظاہر کرتا ہے۔
ذرائع کے مطابق، پاکستان کی مجموعی برآمدات میں 13.8 فیصد کا اضافہ ہوا ہے، جبکہ درآمدات میں 3 فیصد کی کمی آئی ہے۔
