آئی سی سی کی نئی ون ڈے پلیئرز رینکنگ میں افغانستان کے عظمت اللہ عمرزئی نے زبردست چھلانگ لگاتے ہوئے دنیا کے نمبر ون آل راؤنڈر کا اعزاز اپنے نام کر لیا۔
چیمپئنز ٹرافی 2025 میں شاندار کارکردگی کی بدولت عمرزئی نے 296 ریٹنگ پوائنٹس کے ساتھ پہلی پوزیشن حاصل کر لی، جبکہ ان کے ہم وطن محمد نبی اب دوسرے نمبر پر چلے گئے۔
افغانستان کے ابراہیم زادران نے بھی شاندار بلے بازی کا مظاہرہ کرتے ہوئے بیٹنگ رینکنگ میں 13 درجے ترقی کی اور دنیا کے 10 بہترین بیٹرز میں جگہ بنا لی۔
دوسری جانب بھارت کے اکشر پٹیل نے آل راؤنڈر کیٹیگری میں 17 درجے ترقی کر کے 13ویں پوزیشن حاصل کی، جبکہ ویرات کوہلی چوتھی پوزیشن پر آ گئے۔
بولنگ میں نیوزی لینڈ کے میٹ ہنری نے شاندار کارکردگی کے بعد تین درجے ترقی کر کے تیسری پوزیشن حاصل کی، جبکہ سری لنکا کے مہیش تھیکشنا پہلے نمبر پر بدستور موجود ہیں۔
