پاکستان کرکٹ ٹیم کے کپتان سلمان علی آغا نے نیوزی لینڈ کے خلاف چوتھے ٹی ٹوئنٹی میں شکست کے بعد حریف بولرز کی کارکردگی کو سراہتے ہوئے کہا کہ دوسری اننگز میں گیند زیادہ سوئنگ ہو رہی تھی، جس کے باعث بیٹنگ میں مشکلات کا سامنا کرنا پڑا۔ انہوں نے کہا کہ اگلے میچ میں بہتر کارکردگی دکھانے کی کوشش کریں گے۔
دوسری جانب نیوزی لینڈ کے کپتان مائیکل بریس ویل نے اپنی ٹیم کی کامیابی پر خوشی کا اظہار کرتے ہوئے کہا کہ پچھلے میچ میں شکست کے بعد ٹیم نے زبردست کم بیک کیا اور میچ کے ساتھ ساتھ سیریز بھی اپنے نام کر لی۔
واضح رہے کہ چوتھے ٹی ٹوئنٹی میں پاکستانی بیٹرز مکمل طور پر ناکام رہے اور نیوزی لینڈ نے 115 رنز کے بڑے مارجن سے کامیابی حاصل کر کے سیریز اپنے نام کر لی۔ دونوں ٹیموں کے درمیان سیریز کا آخری میچ 26 مارچ کو کھیلا جائے گا۔
