سام سنگ نے اپنا سب سے مہنگا اور فولڈایبل فون 'زیڈ فولڈ تھری' فروخت کے لیے پیش کردیا ہے جس کے بارے میں سام سنگ کا دعویٰ ہے کہ یہ نئے ماڈل پہلے پیش کردہ ماڈل کے مقابلے میں دیرپا اور پائیدار ثابت ہوں گے۔
سام سنگ کے مطابق گیلکسی زیڈ فولڈ تھری اور گیلکسی زیڈ فلپ تھری کی بکنگ 11 اگست سے27 اگست تک جاری رہے گی۔ نیا ماڈل صارفین کے لئے بالکل ایک نئی شے ہوگی جس کے اندر اور باہر 120 ہرٹز کا ڈسپلے ہے۔
اگرچہ یہ فولڈ سیریز کا چوتھا ماڈل ہے اور سام سنگ کو ان کی نزاکت کا احساس بھی ہے۔ زیڈ فولڈ ٹو میں صارفین نے اسکرین چٹخنے کی شکایت کی تھی جس کے بعد کسٹمر سروس میں بہت سے سہولیات کا اضافہ کیا گیا تھا۔ لیکن اب اس فون میں بعض بنیادی تبدیلیاں کی گئیں ہیں جن میں مٹیریئل اور ماڈل کو تبدیل کیا گیا ہے۔ لیکن یہ سام سنگ کا مہنگا ترین فون بھی ہے جس کی قیمت 1799 سے شروع ہورہی ہے اور 1899 ڈالر تک جاتی ہے یعنی آخری مہنگا ترین ماڈل تین لاکھ دس ہزار روپے کا ہے۔
اسکرین کی حفاظتی پرت کو 80 فیصد زائد مضبوط بنایا گیا ہے جبکہ گوریلا گلاس وکٹس سے بیرونی اسکرین تیار ہوا ہے تاکہ کم ازکم کچھ سال تک فون پائیداری سے چلتا رہے۔ اس کی اہم بات یہ ہے کہ اسے مکمل طور پر واٹر پروف بنا کر آئی پی ایکس ایٹ کی سند دی گئی ہے۔ اگراس فون کو 30 منٹ تک پانی میں رکھا جائے تو یہ برباد نہیں ہوگا۔ اسکرین کا ریفریش ریٹ 120 ہرٹز تک بڑھایا گیا ہے۔
اب ذرا فون کے اندر کی بات کی جائے تو 12 جی بی ریم کے ساتھ اس میں کوالکوم کا اسنیپ ڈریگن 888 پروسیسر نصب ہے جبکہ 256 اور 512 جی بی کی گنجائش موجود ہے۔ اس کی پشت پر تین کیمرے لگے ہیں جن میں سے ایک وائڈ اینگل اور دوسرا ٹیلی فوٹو کیمرہ ہے۔ فولڈ ہونے پر ایک اسکرین لگا ہے جس پر 10 میگاپکسل کیمرہ نصب ہے۔
سام سنگ نے اس بار ڈسپلے کےاندر کیمرہ چھپایا ہے جو اس کی پہلی اختراع ہے لیکن شیاؤمی پہلے اس کا مظاہرہ کرچکی ہے۔ چار میگا پکسل کا سینسر بطورِ خاص زوم اور ویڈیو چیٹنگ کے لیے ڈیزائن کیا گیا ہے۔ فولڈ تھری کا اسکرین 7.6 انچ کا ہے۔ اب اس پر ایس پین کی بدولت آپ اسکرین کو نوٹ بک کی طرح استعمال کرسکتے ہیں۔
