عالمی فوجداری عدالت نے اسرائیلی وزیر اعظم کے خلاف جنگی جرائم میں ملوث ہو نے کی پاداش میں گرفتاری کے وارنٹ تو جاری کر دئیے ہیں‘پر اب دیکھنا یہ ہے کہ اس کے تلوں میں کیا اتنا تیل بھی ہو گا کہ وہ اپنے اس اقدام کو عملی جامہ پہنا سکے۔اسرائیل کے وزیراعظم کے پیچھے امریکہ کھڑا ہوا ہے جو اس وقت دنیا میں ہر جگہ ہونے والے شر کا ذمہ دار ہے اور اقوام متحدہ تک کا اس پر بس نہیں چلتا۔وطن عزیز میں مقیم افغانیوں کا لوکل سیاست میں ملوث ہو کر جلسے جلوسوں میں شرکت کرنا ایک غلط روایت ہے۔ قارئین کی
یادداشت کے لئے عرض ہے کہ حال ہی میں عرب امارات کے بعض حکام نے اپنے ملکوں میں پاکستانیوں کے داخلے پر اس لئے سخت پابندی لگا دی ہے اور وہاں پر مقیم پاکستانیوں کو نکالا بھی جا رہا ہے کہ ان میں کئی افراد ان ممالک کی سیاست میں بلواسطہ یا بلا واسطہ ملوث ہوتے ہیں۔ ہمارے حکام بالا کو بھی اس معاملے کا سنجیدگی سے نوٹس لینا چاہئے اور عرب امارات کے ارباب بست و کشاد کی طرح پاکستان کی سیاست میں مخل ہونے والے افغانیوں کے خلاف سخت اقدامات اٹھانے چاہئیں۔ یہ امر خوش آئند ہے کہ حکومت نے بیلا روس اور وسطی ایشیا کے کئی ممالک کے ساتھ قریبی تعلقات استوار کر لئے ہیں‘جو ہماری خارجہ پالیسی کے لئے ہوا کے تازہ جھونکے کے مترادف ہے جو ابھی تک صرف اور صرف امریکہ نواز رہی ہے۔
