کیا آپ جانتے ہیں کہ دنیا کی سب سے مقبول ویب سائٹ کون سی ہے جسے اربوں افراد روزانہ استعمال کرتے ہیں؟
اس کا جواب گوگل ہے، جو کلاؤڈ فلیئر کی 2024 کی فہرست میں ایک بار پھر دنیا کی سب سے مقبول ویب سائٹ قرار پائی ہے۔ یہ مسلسل تیسرا سال ہے جب گوگل نے اپنی پوزیشن برقرار رکھی ہے، جبکہ فیس بک دوسرے اور ایپل تیسرے نمبر پر ہیں۔
یاد رہے کہ گزشتہ کئی سالوں سے گوگل ہی دنیا کی سب سے مقبول ویب سائٹ کے طور پر اپنی جگہ بنائے ہوئے ہے۔
اگرچہ 2021 میں ٹک ٹاک نے گوگل کو پیچھے چھوڑ کر دنیا کے سب سے مقبول ویب ایڈریس کا اعزاز حاصل کیا تھا، لیکن 2022 میں اس کی بالادستی ختم ہو گئی اور 2023 میں بھی وہ دوبارہ اوپر نہیں آ سکا۔ اس سال بھی ٹک ٹاک کا نمبر چوتھا آیا ہے۔
اس کے علاوہ، ایمازون ویب سروسز پانچویں اور مائیکروسافٹ چھٹے نمبر پر ہیں۔ انسٹاگرام ساتویں، یوٹیوب آٹھویں، ایمازون نویں اور پہلی بار واٹس ایپ دسویں نمبر پر آیا ہے۔
اس سال جنریٹیو آرٹیفیشل انٹیلیجنس کی کیٹیگری میں مسلسل دوسرے سال اوپن اے آئی نے نمبر ون پوزیشن حاصل کی۔
رپورٹ کے مطابق 2024 میں انٹرنیٹ ٹریفک میں گزشتہ سال کے مقابلے میں 17 فیصد اضافہ ہوا، جس کی بڑی وجہ اے آئی ٹیکنالوجی میں دلچسپی اور اسمارٹ ڈیوائسز کی بڑھتی ہوئی تعداد ہے۔
اس سال سب سے زیادہ استعمال ہونے والا ویب براؤزر گوگل کروم رہا، جسے 65.73 فیصد صارفین نے استعمال کیا۔ جہاں تک سرچ انجن کا سوال ہے، گوگل کی برتری برقرار رہی اور 88.5 فیصد انٹرنیٹ سرچز کے لیے گوگل کو استعمال کیا گیا۔
