بھارت کے نوجوان اوپنر اور نائب کپتان شبمن گل نے کہا ہے کہ پاکستان کی ٹیم اچھی ہے اور بدقسمتی سے وہ اپنا پہلا میچ ہار گئے مگر پاکستان کوئی کمتر ٹیم نہیں۔
پاک بھارت میچز کی اہمیت پر بات کرتے ہوئے شبمن گل کا کہنا تھاکہ دونوں ٹیموں کے مقابلے ہمیشہ شائقین کے لیے بڑے ایونٹس ہوتے ہیں لیکن بطور کھلاڑی ہمارا کام میدان میں کارکردگی دکھانا ہے، میڈیا میں میچ کو بڑھا چڑھا کر پیش کرنا ان کا کام ہے، اس پر ہمارا کنٹرول نہیں۔
انہوں نے کہا کہ پاکستان کے خلاف یقیناً سنچری کرنے کا دل ہے حالانکہ ہر میچ میں بڑا اسکور کرنے کا ارادہ ہوتا ہے۔
یاد رہے کہ 2023 کے ون ڈے ورلڈ کپ میں پاکستان کے خلاف وہ صرف 16 رنز بنا سکے تھے اور شاہین شاہ آفریدی نے ان کی وکٹ لی تھی۔
شبمن گل کا کہنا تھاکہ دبئی کی پچ پر 280 یا 300 کا اسکور بہت اچھا ہوگا اور اضافی خطرہ لینے کی ضرورت نہیں ہوتی کیونکہ ون ڈے میں اوورز کافی مل جاتے ہیں، وکٹ پر موجود رہیں گے تو اسکور بن جاتا ہے۔
انہوں نے یہ بھی کہا کہ پاک بھارت میچ سے ہمیں کوئی فرق نہیں پڑتا، ہر میچ جیتنے کی کوشش کرتے ہیں، پچھلے میچ میں اوس نہیں تھی مگر بیٹنگ میں مشکل ضرور ہوئی تاہم اگر اسٹرائیک تبدیل کرتے رہے تو جیتنا آسان ہوگا۔
خیال رہے کہ پاکستان اور بھارت کے درمیان کل دبئی میں ٹاکرا ہوگا۔
