محمد عامر، قومی ٹیم کے سابق فاسٹ بولر، نے انڈین پریمئیر لیگ (آئی پی ایل) میں کھیلنے کے بارے میں گفتگو کی۔ انہوں نے نجی ٹی وی چینل پر بتایا کہ اگر انہیں اگلے سال آئی پی ایل میں کھیلنے کا موقع ملا تو وہ ضرور کھیلیں گے۔ محمد عامر نے کہا کہ وہ انٹرنیشنل کرکٹ سے ریٹائر ہو چکے ہیں، اس لیے آئی پی ایل کھیلنے پر پاکستان میں تنقید کی صورت میں انہیں کوئی فرق نہیں پڑے گا۔
عامر نے کہا کہ پاکستانی کرکٹرز پر آئی پی ایل میں پابندی تھی، لیکن ہمارے سابق کرکٹرز کمنٹری کر رہے تھے اور فرنچائز کے کوچ بھی بنے تھے۔ انہوں نے انڈین پریمئیر لیگ کی فرنچائز رائل چیلنجر بنگلور (آر سی بی) کا نام لیتے ہوئے کہا کہ وہ اس کی نمائندگی کرنا پسند کریں گے۔
محمد عامر کے ساتھی احمد شہزاد نے کہا کہ رائل چیلنجر بنگلور کو گیند بازی کی پریشانیوں کو دور کرنے کے لیے عامر جیسے بولر کی ضرورت ہے، وہ آر سی بی کو پہلا ٹائٹل جتوانے کی صلاحیت رکھتے ہیں۔
