پاکستان کرکٹ بورڈ (پی سی بی) کے مطابق پاکستان سپر لیگ (پی ایس ایل) کے 10ویں ایڈیشن کے میچز کے ٹکٹوں کی فروخت کل سے شروع ہو رہی ہے۔ آن لائن ٹکٹیں سہ پہر 3 بجے سے دستیاب ہوں گی جبکہ فزیکل ٹکٹوں کی فروخت 7 اپریل سے نجی کوریئر سینٹرز پر ہوگی۔
آن لائن بک کیے گئے ٹکٹ نجی کوریئر کمپنی کے مقرر کردہ پک اپ مراکز سے حاصل کیے جا سکیں گے۔ پی ایس ایل کے میچز چار شہروں میں ہوں گے، جن میں کراچی، لاہور، ملتان اور راولپنڈی شامل ہیں۔
پی ایس ایل 10 کا فائنل 18 مئی کو لاہور کے قذافی اسٹیڈیم میں کھیلا جائے گا۔ پی سی بی کے مطابق چاروں وینیوز پر عام ٹکٹ کی قیمت 650 روپے مقرر کی گئی ہے۔
راولپنڈی کرکٹ اسٹیڈیم میں ہونے والے افتتاحی میچ میں اسلام آباد یونائیٹڈ اور لاہور قلندرز مدِ مقابل ہوں گے، جس کے لیے ٹکٹوں کی قیمت 1000 روپے سے 8500 روپے تک مقرر کی گئی ہے۔
