پاکستان لانگ رینج رائفل ٹیم نے ایف کلاس نیشنل لانگ رینج چیمپئن شپ 2025 میں شاندار کامیابی حاصل کرتے ہوئے عالمی سطح پر ملک کا نام روشن کر دیا۔ جنوبی افریقہ میں منعقدہ اس بین الاقوامی مقابلے میں پاکستان نے میزبان اور دنیا کی نمبر ون ٹیم کو ان ہی کی سرزمین پر شکست دیتے ہوئے دونوں ٹیم مقابلے جیت کر ڈبل گولڈ میڈل اپنے نام کیا۔
مارچ 2025 میں پاکستان ٹیم نے جنوبی افریقہ میں چار روزہ ونڈ ٹریننگ کیمپ میں شرکت کی، جس کی قیادت معروف کوچز ہینی گربر اور جولیئس ہارٹمین نے کی۔ اس کیمپ کا مقصد ستمبر 2025 میں برطانیہ میں ہونے والی یورپین ایف کلاس ٹیمز چیمپئن شپ اور 2026 میں شیڈول ورلڈ چیمپئن شپ کی تیاری تھا۔
وائس پریذیڈنٹ ٹیم میچ میں پاکستان نے 1200 میں سے 1168 کا متاثر کن اسکور کر کے گولڈ میڈل جیتا، جبکہ چیئرمینز ٹیم کپ میں، جو کہ اس چیمپئن شپ کا سب سے باوقار مقابلہ تصور کیا جاتا ہے، پاکستان نے 1174 کا شاندار اسکور بنا کر دوسری مرتبہ گولڈ میڈل اپنے نام کیا۔
پاکستانی اسکواڈ میں شامل نمایاں کھلاڑیوں میں لیفٹیننٹ جنرل احسن، اسد وحید، عبید ابراہیم، حذیفہ گل، جنید وقاص، لیفٹیننٹ کرنل جنید علی اور سپاہی ولید شامل تھے۔
