یوکرین پر روس کے حملے سے قبل امریکی خفیہ ایجنسیاں روسی صدر کے اقدامات کو دیکھتے ہوئے کام کررہی تھیں تاہم اگر ان کے پاس کوئی اندرونی ذرائع موجود تھے تو شاید وہ انہیں گنوا چکی ہیں۔ کسی کو نہیں معلوم کہ ولادیمیر پیوٹن آگے کیا کریں گے‘ شاید اِس بات کا خود انہیں بھی علم نہ ہو۔ کیا انہیں واقعی ایسا لگتا تھا کہ ان کی افواج کو بہت کم مزاحمت کا سامنا کرنا پڑے گا یا پھر یہ کہ ان کا یہ ’خصوصی آپریشن‘ دوہزارآٹھ میں جارجیا میں پانچ روز تک جاری رہنے والی دراندازی جیسا ہوگا؟ اور کیا انہیں مغرب کی جانب سے عائد کردہ پابندیوں کی شدت کا پہلے سے اندازہ نہیں تھا؟ اگر ان میں سے کوئی بھی اندازہ درست ہے تو اس کا مطلب یہ ہے کہ روسی صدر حد درجہ بے خبر ہیں۔ ممکنہ طور پر اس کی وجہ ان کے معاونین اور مشیران ہیں جو انہیں حقائق پیش کرنے سے بہت خوفزدہ رہتے ہیں۔ یہاں جون 1941ء کی یاد تازہ ہوجاتی ہے جب جوزف سٹالن نے سوویت جاسوسوں کی جانب سے ملنے والی نازی حملے سے متعلق قابلِ اعتماد اطلاعات کو مسترد کردیا تھا۔ سٹالن کے ساتھی بھی اتنے خوفزدہ تھے کہ وہ انہیں اس غلطی پر خبردار نہیں سکے۔
ظاہر ہے کہ اس مرتبہ سب سے بڑا فرق یہ ہے کہ خود روس جارح ہے۔ جس طرح آٹھ دہائیوں قبل جرمنی نے روس کو کم تر تصور کیا تھا شاید وہی غلطی اب روس نے کی ہے۔ خبروں کے مطابق روسی افواج کو ان کے اندازوں سے زیادہ نقصانات کا سامنا کرنا پڑرہا ہے۔ معلومات یا یوں کہئے کہ غلط معلومات کی بھرمار کے باعث جھوٹ اور حقیقت میں فرق کرنا بہت مشکل ہے۔ صدر پیوٹن تو یہی کہہ رہے ہیں کہ سب کچھ منصوبے کے مطابق چل رہا ہے لیکن ظاہر ہے کہ وہ اس کے علاوہ کچھ اور کہہ بھی نہیں سکتے۔ ایسا لگ رہا ہے کہ بڑھتے ہوئے نقصانات کے ساتھ ساتھ حکمت ِعملی کو بھی کچھ تبدیل کیا جارہا ہے۔ دوسری جانب امریکی صدر جو بائیڈن نے ہفتے کے روز وارسا میں فی البدیہہ تقریر کرتے ہوئے ایسی بات کہہ دی جس سے یہ گمان ہوا کہ وہ روس میں حکومت کی تبدیلی کا اشارہ دے رہے ہیں۔ مذکورہ تقریر سے کسی کا بھی فائدہ نہیں ہوا اور اس کے بعد مشیران اور اتحادیوں نے صورتحال کو قابو میں لانے کی کوششیں کیں۔ خود صدر بائیڈن نے صحافیوں کو بتایا کہ ان کا بیان ’اخلاقی طور پر ناراضگی کا اظہار‘ تھا اور اسے ’پالیسی میں تبدیلی کا اظہار‘ نہ سمجھا جائے۔
کمزور ممالک میں حکومتوں کا تختہ الٹنے کے امریکی تجربے کو دیکھتے ہوئے امریکی صدور کو اس قسم کا لہجہ اختیار نہیں کرنا چاہئے۔ خاص طور پر ایسے وقت کہ جب بات ایسے ملک سے متعلق کی جارہی ہو جس کا جوہری ہتھیاروں کا ذخیرہ بھی امریکہ کے جوہری ذخیرے کا مقابلہ کرسکتا ہو۔ اس کے برعکس صدر بائیڈن کا لہجہ اس حالیہ طرزِ عمل کے بالکل مطابق ہے جس کے تحت پیوٹن کے سامنے دھمکیوں اور اشتعال کا ڈھیر لگایا جارہا ہے بلاشبہ پیوٹن بدترین امیدوں پر پورا اترے ہیں۔ ہم اب بس اس حوالے سے سوچ ہی سکتے ہیں کہ اگر گزشتہ کچھ ماہ کے دوران امریکہ کی جانب سے سفارت کاری پر زور دیا جاتا تو کیا روس کی جانب سے اس قدر غیر دانشمندانہ حملے کو روکا جاسکتا تھا۔ روس یوکرائن میں جنگ سے قبل سفارتکاری کو موقع ضرور ملنا چاہئے تھا لیکن یہ تسلیم کرنا بھی ضروری ہے کہ اس سے بہت زیادہ فرق نہ پڑتا۔ اگر ہم ماضی میں روسی صدر کی جانب سے روسی تاریخ کے حوالے سے ان کے نظریات سنیں تو وہ صرف سوویت یونین تک نہیں بلکہ زار دور تک جاتے ہیں۔ وہ بظاہر قوم پرست فلسفی ایوان ایلین اورالیگزینڈر ڈوگین سے اپنی نظریاتی خوراک حاصل کرتے ہیں۔
ان کے مقالوں نے یورپ اور امریکہ میں بھی انتہائی دائیں بازو کے افراد کو متاثر کیا ہے۔ یوکرین میں ’نازی فکر سے متاثر‘ افراد کو ختم کرنے کیلئے بہت حوصلہ چاہئے اگرچہ یوکرین میں قوم پرستانہ شدت پسندی کے حوالے سے مشکلات ہیں لیکن اتنی نہیں جتنا کہ دعویٰ کیا جاتا ہے۔ نئی صدی کے آغاز میں جب پیوٹن کریملن میں آئے اور اس کے فوراً بعد بورس یلسن کی جگہ لے لی تو انہیں ممکنہ طور پر ایک بہت بڑی بہتری کے طور پر دیکھا گیا۔ انہیں ایک ایسے شخص کے طور پر دیکھا گیا جو روس میں کسی حد تک نظم و ضبط لائے گا اور اس کی جمہوریت کا گلا گھونٹے بغیر اس کی معیشت کو مستحکم کرے گا لیکن چیچنیا میں ان پر نظر رکھنے والوں کو ایسا کوئی وہم نہیں تھا۔ مشرق کی طرف نیٹو کی توسیع کے حوالے سے ان کا سخت رویہ غیر معمولی تھا۔ کوئی بھی روسی رہنما شاید ایسا ہی محسوس کرتا اور اسے شبہ ہوتا کہ واشنگٹن ماسکو کو نیچا دکھانے کے لیے ایسا کررہا ہے لیکن پھر بھی ان میں سے اکثریت روس کو دورباہ عظیم بنانے کیلئے اس راستے کا انتخاب نہیں کرتی جس راستے کا انتخاب پیوٹن نے کیا ہے۔ حالیہ ہفتوں میں لاکھوں روسی شہری ملک چھوڑ چکے ہیں۔
وہ ایک ایسے پڑوسی کے خلاف بلاجواز جارحیت کے صدمے کو برداشت کرنے سے قاصر تھے جس سے انہیں کوئی فوری خطرہ نہیں تھا۔ پیچھے رہ جانے والے جنگ مخالف لوگ اقلیت میں ہیں۔ وہ نہ صرف ریاست اور اس کے فریب زدہ حکمران کے غصے کو برداشت کررہے ہیں بلکہ برین واش کئے گئے اپنے ساتھی شہریوں کی دھمکیوں کا بھی سامنا کررہے ہیں۔ اس وقت تو پیوٹن کے بعد کے روس کا تصور کرنا بہت مشکل ہے۔ فوری طور پر اگر ہم کسی بہتر چیز کی امید کرسکتے ہیں تو وہ مذاکرات کے نتیجے میں ہونے والی جنگ بندی ہے۔ اس کی بنیاد اس غیر جانبداری پر ہونی چاہئے جس پر یوکرین کسی حد تک پہلے ہی راضی ہوچکا ہے‘ شاید ان مذاکرات میں متنازعہ مشرقی علاقوں کیلئے کسی حد تک خود مختاری بھی شامل ہو۔ اس سے حالات معمول پر تو نہیں آئیں گے لیکن کم از کم یوں مزید اموات سے بچا جاسکے گا۔ شاید اس طرح روسی شہریوں کو بھی اس بات کا اندازہ ہوجائے کہ ان کا عظیم رہنما تاریخ کی قربان گاہ میں ان کے مستقبل کو قربان کررہا ہے۔ (بشکریہ: ڈان۔ تحریر: ماہر علی۔ ترجمہ: ابوالحسن امام)
