تعلیم معاشرتی ترقی کی بنیاد ہے، جو افراد کو اپنی صلاحیتوں کو ابھارنے، جدت کے فروغ اور دنیا میں بامعنی کردار ادا کرنے کے قابل بناتی ہے۔ ایک ایسے عالمی منظر نامے میں جو تیزی سے تکنیکی ترقی اور انٹرڈسپلنری چیلنجز کی شکل اختیار کر رہا ہو، روایتی تعلیمی فریم ورک سے بالاتر ہو کر نقطہ نظر اپنانا ضروری ہو گیا ہے۔ یہ وہ مقام ہے جہاں ”اسٹیم پاکستان“ نامی حکمت عملی کا سفر شروع ہوتا ہے جس کا مقصد پاکستان میں طلبہ اور اساتذہ کے لئے تعلیمی تجربے میں انقلاب برپا کرنا ہے۔ سائنس، ٹیکنالوجی، انجینئرنگ، آرٹس اور ریاضی سے اخذ ’اسٹیم‘ بنیادی طور پر طلبہ میں تجسس، جدت اور تنقیدی سوچ کو فروغ دینے کی کوشش ہے، جس سے نوجوان رہنماؤں کی ایک نسل کو اکیسویں صدی کے تقاضوں کو پورا کرنے کے لئے تیار کیا جاتا ہے۔روایتی تعلیمی نظام بھی اگرچہ اپنی جگہ اہم ہے تاہم طالب علموں کو تیزی سے پیچیدہ اور مربوط دنیا میں مہارت حاصل کرنے کے لئے ضروری مہارتوں سے لیس کرنا ضروری ہے جو موجودہ نظام کرنے میں ناکام رہتا ہے۔ یہ نظام عام طور پر رٹے پر زور دیتا ہے جہاں یادداشت کو تفہیم اور اطلاق پر ترجیح دی جاتی ہے۔ اس طرح کا نقطہ نظر نہ صرف طلبہ کی فکری ترقی کو محدود کرتا ہے بلکہ ان کی تخلیقی صلاحیتوں اور مسائل کو حل کرنے کی صلاحیتوں کو بھی روکتا ہے جو کہ کسی مسابقتی عالمی معیشت میں ضروری اور اہم خصوصیات ہیں۔ پاکستان میں وسائل تک محدود رسائی، فرسودہ نصاب اور انٹر ڈسپلنری لرننگ پر زور نہ دینے کی وجہ سے یہ چیلنج مزید پیچیدہ ہو گئے ہیں۔ ان خلا کو تسلیم کرتے ہوئے اسٹیم پاکستان کے اسکول جرنی کا مقصد جامع تعلیمی تجربہ فراہم کرنا ہے جو عملی اور دستی تعلیم کے ساتھ تعلیمی سختی کا امتزاج ہے۔ یہ اقدام اس بات کو یقینی بناتا ہے کہ طلبہ نہ صرف تعلیمی طور پر تیار ہوں بلکہ یہ متحرک دنیا میں کامیابی کے لئے ضروری اہم مہارتوں اور ذہنیت سے بھی لیس ہوں۔ اسٹیم پاکستان کے نام سے تعلیمی اداروں کا سفر ملک میں تعلیم کو تبدیل کرنے کے لئے جرأت مندانہ ویژن کی نمائندگی ہے۔ اس پروگرام کا بنیادی مقصد ہموار اور متحرک سیکھنے کا ماحول پیدا کرنا ہے جو تنقیدی سوچ، تخلیقی صلاحیتوں اور تعاون کو دیگر ضمنی امور پر ترجیح دیتا ہے۔ عالمی تعلیمی معیارات سے ہم آہنگ اور ثقافتی طور پر متعلقہ مواد کو مربوط کرکے اسٹیم پاکستان اس بات کو یقینی بناتا ہے کہ طلبہ کو ایسی تعلیم حاصل ملے جو جدید اور سیاق و سباق پر مبنی ہو۔ اس اقدام کا ایک اہم پہلو شمولیت پر زور ہے۔ اسٹیم پاکستان تسلیم کرتا ہے کہ سماجی و اقتصادی حیثیت یا جغرافیائی محل وقوع سے قطع نظر معیاری تعلیم تک رسائی بنیادی حق ہے۔ اس مقصد کے لئے یہ پروگرام پسماندہ برادریوں کو وسائل، تربیت اور مدد فراہم کرکے تعلیمی عدم مساوات کو ختم کرنے کا کام کرتا ہے۔ ایسا کرتے ہوئے، یہ تمام سیکھنے والوں کو بااختیار بنانا چاہتا ہے تاکہ بذریعہ تعلیم مثبت تبدیلی لائی جا سکے۔ اسٹیم پاکستان اساتذہ کی صلاحیتوں اور علم کو بڑھانے کے لئے تیار کردہ جامع تربیتی پروگرام کے ذریعے درپیش چیلنجوں سے نمٹنے کی حکمت عملی ہے۔ یہ پروگرام اساتذہ کو جدید تدریسی حکمت عملی، ڈیجیٹل ٹولز اور اسٹیم فریم ورک پر مبنی ہے جس سے وہ دلچسپ اور مؤثر اسباق تخلیق کئے جا سکتے ہیں۔ مقامی اور بین الاقوامی تنظیموں کے ساتھ شراکت داری ضروری مالی وسائل (فنڈنگ) اور مہارت فراہم کرنے میں یہ حکمت عملی اہم کردار ادا کرتی ہے۔ پاکستان اکیسویں صدی کے چیلنجز اور مواقع سے نبرد آزما ہے، جدید تعلیم کی اہمیت کو نظر انداز نہیں کیا جا سکتا۔ اسٹیم پاکستان جیسے پروگراموں کے ذریعے ہم اس بات کو یقینی بنا سکتے ہیں کہ ہر بچے کو معیاری تعلیم تک رسائی حاصل ہو جو انہیں مستقبل کے لئے تیار کرے اور مل کر ہم ایک ایسی قوم کی تعمیر کر سکتے ہیں جہاں تخلیقی صلاحیتوں کی کوئی حد نہ ہو اور ہر طالب علم کو اپنی پوری صلاحیتیں بروئے کار لانے کا موقع مل سکے۔ (بشکریہ دی نیوز۔ تحریر ڈاکٹر انتخاب الفت۔ ترجمہ اَبواَلحسن اِمام)
