پاکستان میں محصولات سے متعلق بندوبست (ٹیکس وصولی کا نظام) مسائل سے بھرپور ہے اور اِس نظام سے جڑے بڑے مسائل میں سے ایک اس نظام میں دانستہ اور نادانستہ طور پر گہرائی سے پیوستہ ناانصافیاں ہیں یعنی وہ افراد جو اپنی مرضی یا ملازمتی و کاروباری تقاضوں کے باعث رجسٹر شدہ اور ٹیکس نیٹ میں شامل ہیں وہ ایک بھاری رقم ٹیکس کی صورت باقاعدگی سے ادا کرتے ہیں مگر دوسری طرف وہ لوگ جو ٹیکس گزار کی حیثیت سے رجسٹرڈ نہیں ہیں وہ ایک مدت سے تھوڑا یا بالکل بھی ٹیکس ادا نہیں کر رہے ہیں اور اس پر ستم یہ کہ ان میں سے بہت سوں کو ریاست کی جانب سے بار بار کسی نہ کسی صورت میں رعایتیں بھی دی جاتی رہی ہیں۔ مزید برآں ماضی میں مخصوص طبقات کو فائدہ پہنچانے کیلئے بہت سے ٹیکسوں کو معاف کر د یاگیا ہے جبکہ کچھ ایسے بھی شعبے ہیں جنہیں چند مواقع پر ٹیکس چھوٹ بھی دی جاتی ہے۔ اب جو لوگ ٹیکس نیٹ میں آتے ہیں اور جنہیں تمام ٹیکسوں کو ادا کرنا پڑتا ہے وہ محصولاتی نظام اور ریاست کے بارے میں کیا رائے رکھتے ہوں گے؟ ناانصافی کا دوسرا پہلو یہ ہے کہ زیادہ تر جن لوگوں کو ٹیکس ادا کرنا پڑتا ہے یا جو ان ٹیکسوں کی ادائیگی سے مطمئن ہیں انہیں بھی لگتا ہے کہ ان کے ٹیکس کے بدلے ریاست انہیں زیادہ کچھ نہیں دے رہی ہے۔ رائے عامہ یہی ہے کہ ریاست تعلیم اور صحت کی جو سہولیات فراہم کرتی ہے جن کے سبب متوسط آمدن اور اعلیٰ آمدن کے حامل افراد ان سہولیات کیلئے اپنے علاقوں کے متعلقہ نجی اداروں کا رخ کرتے ہیں۔ فراہمی آب اور نکاس آب‘ کچرے کو ٹھکانے لگانے اور سکیورٹی کیلئے بھی اکثر نجی اداروں کی اضافی مدد حاصل کی جاتی ہیں اور چند جگہوں پر ایسے تمام تر کاموں کا مکمل انحصار نجی شعبے پر ہوتا ہے۔ بہت سے ٹیکس دہندگان کو ایسا محسوس ہوتا ہے کہ ناانصافی صرف یہیں تک محدود نہیں۔ کئی ٹیکس دہندگان تو اس قابل ہوتے ہیں کہ وہ نجی شعبے سے اپنی ضروریات پوری کرلیں مگر جن کے پاس وسائل کی کمی ہے انہیں پھر (پانی‘ نکاس آب‘ صحت‘ تعلیم‘ سیکیورٹی کی) سرکاری خدمات پر ہی انحصار کرنا پڑتا ہے۔ یوں انہیں پھر سرکار کی جانب سے غیر تسلی بخش خدمات فراہم کی جارہی ہوتی ہیں۔ اب اگر حاصل کردہ محصولات کے ذریعے اس پر منحصر افراد کو سہولیات فراہم نہ ہوں تو ایسی صورتحال سے شہری کس طرح مطمئن ہوسکتے ہیں؟ انکم ٹیکس کی شرح پانچ فیصد سے پینتیس فیصد تک پہنچ جاتی ہے۔ اگر آپ اپنی ماہانہ آمدن کے معاملے میں متوسط یا اس سے تھوڑے بڑے درجے میں آتے ہیں اور ٹیکس نیٹ میں شامل ہیں (یہ بات تقریباً تمام تنخواہ دار طبقہ اور رجسٹر شدہ کاروبار پر صادق آتی ہے) تو عین ممکن ہے کہ آپ صرف انکم ٹیکس کی مد میں ہی اپنی آمدن کا اوسطاً پندرہ سے بیس فیصد حصہ بطور ٹیکس ادا کر رہے ہیں۔ تنخواہ داروں کو تو ٹیکس ادا کرنے کی نوبت بھی نہیں آتی کیونکہ انہیں ٹیکس کٹوتی کے بعد ہی تنخواہ ملتی ہے۔ پھر آتا ہے سیلز ٹیکس جو اکثر مصنوعات اور متعدد سروسز پر تقریباً سولہ سے سترہ فیصد تک ادا کرنا پڑتا ہے اور بہت سی مصنوعات اور سروسز کی فراہمی پر ایسے خصوصی لیویز اور ٹیکس ادا کرنے پڑتے ہیں یعنی وہ مصنوعات اور خدمات جن کی قیمت بڑھنے کے باوجود طلب کو زیادہ نقصان نہیں پہنچے یا جہاں سے ریاست باآسانی اور کم خرچ کے ساتھ ٹیکس وصول کرسکتی ہے۔ ان میں ٹیلی فون بل‘ گیس اور بجلی کی سہولیات کے علاوہ پیٹرولیم مصنوعات شامل ہیں۔ رواں ماہ میں نے اپنے بجلی کا جو بل ادا کیا اس کی رقم کا پچیس فیصد حصہ اضافی ٹیکسوں اور سرچارجز پر مشتمل تھا۔ پیٹرولیم مصنوعات پر ٹیکس وصولی کے درجے کو اگرچہ بڑی حد تک مبہم رکھا جاتا ہے لیکن ان پر اچھا خاصا ٹیکس وصول ضرور کیا جاتا ہے۔ روڈ ٹیکس اور مقامی پانی اور دیگر سرچارجز سمیت دیگر تمام سروسز پر بھی ٹیکس وصول کیا جاتا ہے۔ تنخواہ دار‘ رجسٹر شدہ اور ٹیکس نیٹ میں شامل افراد غالباً اور اوسطاً اپنی آمدن کا تقریباً پچاس فیصد مختلف ٹیکسوں کی صورت میں ریاست کو دے دیتے ہیں۔ یہ تناسب کسی بھی طور پر معمولی نہیں کہا جاسکتا۔ جو افراد ٹیکس نیٹ میں شامل نہیں ہیں یا جنہیں ٹیکس معاف کیا گیا ہے‘ انہیں اوسط کے اعتبار سے صرف بالواسطہ ٹیکس ادا کرنے پڑتے ہیں لہٰذا ناانصافی عیاں ہے۔ کاشتکاروں کو ٹیکس کی چھوٹ کیوں دی جائے؟ تاجروں یا پراپرٹی کے کاروبار سے منافع کمانے والوں کو معمولی سا ٹیکس کیوں دینا پڑتا ہے؟ یہ کہنا کہ ریاست ان کیلئے ٹیکس وصولی کا نظام بنانے سے قاصر ہے‘ اسے ناانصافی نہ کہا جائے تو اور کیا کہا جائے۔ گزشتہ دہائیوں کے دوران ریاست ایک منصفانہ نظام تیار کرنے میں ناکام کیوں رہی ہے؟ ریاست کی جانب سے جو خدمات فراہم کی جاتی ہیں وہ عموماً غیر معیاری ہوتی ہیں یوں معاملہ مزید بگڑ جاتا ہے۔ چنانچہ ہر قسم کی سہولت کیلئے ریاست کی خدمات پر منحصر رہنے والے شہریوں کو مشکلات کا سامنا رہتا ہے جبکہ جو لوگ ٹیکس ادا کرتے ہیں وہ اپنے حصے سے زیادہ کا کام انجام دے رہے ہیں۔ یوں نظام کی بظاہر اور حقیقی ناانصافیوں میں مزید اضافہ ہوجاتا ہے۔ ریاست چاہتے نہ چاہتے ہوئے بالواسطہ ٹیکس دینے والوں پر تکیہ کرتی ہے یا پھر ان افراد سے زیادہ سے زیادہ ٹیکس بٹورنے کی کوشش کرتی ہے جو پہلے سے ٹیکس نیٹ میں شامل ہیں۔ دونوں آپشنز ہی ٹیکس نظام کی ناانصافی کو بڑھاتے ہیں۔ اس روش کا خاتمہ کرنے کیلئے لائحہ عمل درکار ہے۔ اگر اس روش کا خاتمہ نہ ہوا تو محصولات سے زیادہ آمدنی (ریونیو) پیدا کرنے کی ریاست کی صلاحیت کمزور ہوگی اور یہ کمزوری اقتصادی پیداوار اور استحکام کیلئے تباہ کن ثابت ہو سکتی ہے۔(بشکریہ: ڈان۔ تحریر: فیصل باری۔ ترجمہ: ابوالحسن امام)
